Dewleta Tirkîya hînê dîrokî de qetilkarê domananê kurdan hesibîyena. Heyana ewro dewleta AKP domananê kurdan sirf bi tena kerrey eştî polêsan û nê sebeb ra domanê kurdan tepişti îşkence kerdî û kerdî zindana, zindana de zî heme tewr îşkence û tecawiz kerdî. Hînê no hewa bes nêbe nayra zî nê domanan ra bi desan serran ra vêşî cezaya girana daya. Enka zî bi rewşa zanayî ra gedeyanê kurdan yew bi yew qetil kenê. Yew dewleta ke gedeyanê kurdan ra biterso û kê nê dewlete ra hînê bi çi bipawê? Dewleta Tirkîya no warî de heyana ewro qetilkerdişê Ugur Kaymazî ra tepîşe bi seyan ra domanî qetil kerdî û seba nê qetilkerdişê gedeyan ra zî qet yew roj zî hesab nêdayo. Qalî ameyê qalî se, Serekkomar Tayyîp Erdogan dewleta Îsraîlî ra vano şima weş qetilkarey kenê û yew heti ra zî wexto ke domanê Filîstînî kerreyan erzenê polêsanê Îsraîlî ra, bi heseban ra nê domananê Filîstînî zaf wesifnenê û danê wesifnayîş.
Eke newbe ameyê domananê kurdan se, domanê kurd benê terorîst û yan zî benê eşqîya. Hewayê her wextî dewleta Tirkîya dirîyeya û sextekareya xo her dem îspat kena. Qirkerdişê Roboskî de çend domanê kurd qetil bîyê? Dewleta AKP hema zî hesabê qetilkerdişê Roboskî nêdayo. No warî de AKP çiqas ser domanan qirkerdişî viraştî nê heme qirkerdişî înan rê kar mendî. Û nê sebeb ra yo ke hema zî ser domanê kurdan ra qirkerdişê xo dewam kena. No yew serre mîyanî de Amed de, Colemerg de, Cizîr de qetilkerdişê domanan hînê kura beno se nîno hesab kerdiş. Eke yew dewlete de yew doman bi hetê polêsanê dewlete ra qetil bibo se, Serekê nê dewlete ganî îstîfa bikero û nê zî seba kiştişê domanî ra zî serehewanayîş virazîyeno. La mixabin Tirkîya de seba kiştişê û qetilkareya domananê kurdan ra çekî nêbeno. No warî Tikîya de huqûq nêşixulîyeno û no ser zî serehewenayîş virazîyeno. No çend hewtî mîyanî bi tena Cizîr de 6 domanî bi hetê dewlete ra qetil bîyî û hema zî erkê dewlete wardenê eşqîyayey ra behs kenê û vanê; ma Cizîre eşqîyayey ra xelisnenê. Yanî ewta de bi aşkera dewleta Tirkîya hemverê kurdan ra yew şero gird îlan kerdo.
AKP aşkerayî qetil kena
Çîyrê dewleta AKP bi taybetî Cizîre û Colemêrge de ser gedeyan ra bi aşkerayî ra qirkerdişê xo dewam kena? Çimkî Colemêrg de û Cizîr de şar hemverê şîdetê terore AKP ra pawitişê xo no esasî virazena. No sebeb ra yo ke AKP bi rewşa aşkerayî ra bi taybetî domananê kurdan qetil kena. No hewara zî vanê wa kurdî pawitişê xo nê esasî nêbivirazê û bêpawitiş bimanê. No warî yew mîlçike daxî wexto ke merdim têkilîya leyîrê mîlçike bise nê mîlçike gala merdiman kena û leyîrê pawina. No hewa bi rewşa xozayî ra heme cayê dinyayî de her merdim û her komel heqê eyo xozayî esto ke xo bi rewşa xozayî ra hemverê şîdetî ra û qirkerdişî ra xo bipawo. No warî de dewleta AKP hema zî kurdan mêşna hesibnena vana ez kurdan qetil kena û en çîyo xiznayî zî domananê kurdan qetil kena û wa kurdî zî vengê xo nêkerê û xo nêbipawê.
Rewşa nêweşê sîyasîyê hepisîyan
No sebeb ra yo ke Cizîr de seba yo ke şar xo paweno û pawitişê xono esasî virazenê û dewleta AKP hine bêrehetî bena û har bena hêrîşê gala domanan kena. Nê galakerdiş bes nîyo û hînê nayra zî yew bi yew gedeyan qetil kena û nê qetilkerdiş ra dime ra zî beyanatê aşkerayî danê vanê; ma Cizîre eşqîyayan ra xelisnenê. Seba nê beyanatê xelisnayîşê eşkîyayî ra ganî heme kes wardo pay û çalakîya xoverodayîşê û serehewanayîşî virazîyenî. No beyanatê AKP beyanatê yew qirkerdişê peyamê newî yo. No sebeb ra yo ke şarê kurd ganî heme cayê heremîyê Kurdistanî de hedreyî ya pawitişê xo no esasî bivirazo. No warî de hukûmatê AKP seba ravêrayîşê çareserî ra hewayê her demî demogojî kena û kayê xapênayîşê Osmanî virazena. Seba pêvînayîşê çareserîya muzakerî ra raşte de çekî çîno. AKP wazena ke hewayê her wextî xapênayîş bikero û weçînayîşê pêroyinî bê qeza û bê bela ra bivîyarno. Nazî sewbîna tewr rewşe zî fasofîsa ya. Eke AKP no warî de bi rewşa raştî ra tikê samimî bibînê se, verê verkan zindanan de nêweşê sîyasîyê hepisîyan bê rewşa şertî ra serbest veradê. Ana aseno ke no warî de AKP hema zî zîhnîyetê xo no qilêrinî de israr kena û wazena ke no warî de hema zî wext qezenc bikerê Ewta de yew tek weçînite maneno, o zî xo pawitişê esasî yo. Bi rewşa raştî ra nê pawitişê esasî ganî rewna bivirazîyanê. No warî de zî ganî şar her roj tikêyna rêxistinayî ya xo zaf û gird bikero.
No warî de kurdî ganî heme şaristanan de, dewan de, taxan de, kuçeyan de pawitişê xo nê esasî ra hadreyî bikerê. Cizîre de, Colemêrge de şar senîhewa pawitişê xo no esasî keno se û ganî heme cayanê heremîyê Kurdistanî de eynî pawitiş bibo. Seba yo ke Cizîre de şar pawitişê xo no esasî virazenê û hukûmatê AKP zî nê pawitişê şarî nêeşkenê ke hezm bikerê û nayra zî hem domanan qetil kene û hem zî domananê şarê kurd eşqîya îlan kenê. Cizîre de dewleta AKP bi xo eşqîyayey kena û yew hetî ra zî şarê kurd sûcdar kena. Eke hukûmatê AKP heyana hesabê nê qetilkareya domananê kurdan nêdo se, ganî kurdî zî her roj payra bêy û xoverodayîşê û serhildanî bivirazê. Çimkî heyana ewro hukûmatê AKP çi qetilkarey kerda se nê heme qetilkarey derê kar meno û nê sebeb ra yo ke her roj nê bêvengey ra têkêyna cesaret gêyna û qetilkareya xo dewam kena.