Hikûmeta AKP ya ke Kurdistan de lejî kena xorîn û qetlîamanê sivîlan ramena, vera civakî zî, zext û zorvajiyan kena. Kam ke heqê xo geyreno, polîtîkayanê AKP yê şaş rexne keno beno hedef. Raştê cipersyayen yeno, girotiyeno bin çiman, kar ra yeno eştiş. Nimûneya tewr rind zî akademîsyenê ke vatî ‘ma nêbenê piyakarê herbî’ ya.
Cezayê kêfî
Qezaya Riha Sêwereg de zî mualimê bi nameyê Bayram Bardakçi, bi sebebê kêfî û bêhiqûqî kar ra ame eştiş. Bardakçi tewrê damustayina ke qandê protestokerdişê polîtîkayanê qetlîam viraziya bi, ewja de sloganê ‘Bicuw xoverdayişê Cizîr’ eşt û îşaretê serkewtişî kerd. Bi nê sebeban qeymeqamê sûk qerarê kar ra vetiş da Bardakçi.
Bardakçi 17ê Çile de, netîceyê sereştişê keye de hetê polîsan ame binçimkerdiş. Bi îdiayê ‘propagandayê rêxistin kerdiş’ û ‘azabiyena rêxistin’ cipersyayen ame destpakerdiş. Barçakçi o ke vejya verniya mahkeme, serbest ame viradayen. La ebi jû teblûgat kar ra ame eştiş.
Ma dê heqê xo bigeyrê
Bayram Bardakçi, na bêhiqûqînî ra nêrazîbiyen damusna û ard ziwan ke, werte de sebeb çinyo, la kar ra ame eştiş. Bardakçi ard ziwan ke, nê polîtîkayî nînê qebûl kerdiş û wina va: “Tenya ez nê, xeylê imbazê ke Sêwereg û cayanê bîn de yê raştê zextî yenê, cipersyayenî yenê akerdin. Wazenê bi nê polîtîkayan ma bidê tersnayiş.
7 mualimî wezîfe ra dûr amey eştiş
Bardakçi da zonayene ke, eyra piya, 8 mualimî wezîfe ra dûr amey eştiş û cipersyayen ame destcikerdiş û va, çiyo ke sûc o ma nêkerd, vera na nêheqî ma dê zî heqê xo bigeyrê.
Qeymeqamê Sêwereg Vûral Karagul, o ke mualiman hedef damusna û kar ra vet, ser medyaya sosyal de, mualîman zey gurekarê rêxistina ‘terorî’ damusna.
HASAN YOLDAŞ/ANF/RIHA