Komsera Heqanê Merdiman a Hukmatê Federalî yê Almanya Barbele Kofler derheqê destsernayîşanê şaredarîyan û destbendkerdişanê hemşaredaran de eşkerayîyêke weşanaye. Barbele Kofler eşkerayîye de vat: ''Tirkîya de 8 hemşaredarî wezîfe ra ameyî girewtene ke na rewşe mi zaf qerqiznena. Verê cû dewayanê heman de Komîsera Heqanê Merdiman a Konseya Ewropa Dunja Mijatoviz zî bi delîlan eşkera kerd bi ke peyê nê wezîfe ra girewtişan de armancê sîyasîyî estê. La ganî hukmkerdiş qet sey hacetê armancan ê sîyasîyan nêro xebitnayene.'' Koflere venga Tirkîya da ke goreyê berpirsîyarîyanê xo yê mîyanneteweyîyan û qaîdeyanê heqanê merdinan têbigêra. Koflere menga teşrîna peyêne de Bundestag de Hemşaredarê Êlihî Mehmet Demîrî reyde qisey kerdbi. Barbele Koflere no qiseykerdiş vist vîrî û vat: ''Çarçewa nê qiseykerdişî de ez venga Tirkîya dana ke wa dezgehê cinîyan meqefilna û projeyê paştdayîşê cinîyan asteng nêkera.'' Koflere ard ziwan ke 'sûcdarîya hetkarîya terorî' seba destsernayîşanê şaredarîyan sey bahane ameye xebitnayene. BRUKSEL