Akademîsyene Nurîye Gulmene û mamosta Semîh Ozakça seba ke çarçeweya Qerarnameyê Hukmê Qanûnî (KHK) de karê xo ra ameybî îxraçkerdiş û seba ke bişînbî peyser biagêrî karê xo, grevê vêşanî daybî destpêkerdiş.
Gulmene û Ozakçayê ke rojanê 80î de ameybî tewqîfkerdiş û erşawîyaybî zîndan, reyna zî çalakîya xo domnenî û çalakîya înan roja xo ya 100. de dewam kena.Avûkat Engîn Gokogluyî zîndan de înan zîyaret kerd û derheqê rewşa Gulmene û Ozakçayî de malumat da çapemenîye. Gokogluyî bale ant rewşa Gulmene ser û wina va: “Bitaybetî rewşa Gulmene krîtîk a. Gulmene êdî bi wesayîtê astengdaran ameye pêvînayîşî û êdî destê aye qeleme nêtepiştêne. Adaleyanê Gulmene de helîyayîş estbî, reyna laşê aye de bêhalî û vera roşnî de hesasîyet dest pêkerd. Seba ke demêko derg vîtamînê B-1î ra mehrûm menda, hişê aye zeîf bîyo. Gulmene tena sereyê xo nêşêna lazimîyanê xo pê bîyara.”
Çimanê ma ver de helîyenî
Gokogluyî dewamê qiseykerdişê xo de qala Ozakçayî zî kerd û wina va: “Semîh Ozakça zî êdî nêşêno bi tena sereyê xo lazimîyanê xo pê bîyaro. Mesele hetê hiş de vîrîkerdiş Ozakça de zaf aver nêşîyo. Her ke şono weşîya her diyan zî xirabêr bena. Çimanê ma ver de roj bi roje helîyenî.” Heto bîn ra ame musayîş ke Miletê Yewbîyaye seba Gulmene û Ozakça mektûbek erşawito Wezîrîya Edaletî û veng dayo.
DÎHABER/ANQARA