Zangeha Tûncelî hurendiya Navendê Cipersayişê Alewi, Enstîtuyê Cipersyayişî rona. No Enstîtu yo ke alewiyan zey duştê welatî’ vîneno, alewiyan zey teşkîlatê taloke’ îfade kerd. Vera nê îfadeyan ADAD kombiyayişê çapemenî viraşt û nê îfadeyan rexne kerd.
Komela Alewiyê Demokratîk yê Enqera (ADAD) derheqê babeda gureyinê alewitî yê Zangehê Tûncelî de kombiyayiş viraşt. Hemserokê ADAD Mûrat Işik’î kombiyayin de qisey kerd û da zonayen ke gureyinê sifte yê Enstîtuyê Cipersyayişê Alewiyê Bektaşî ke hurendiya Navendê Cipersyayişê Alewitî de roniya hometa alewî zey ‘dûştê welatî’ ‘teşkîlatê fikrî ke jûbiyena welatî tehdît keno’ îfade kerd.
Navendê qirkerdenê kulturî
Işik’î no îfadeyê enstîtu rexne kerd û vist vîrî ke no metîn bi skandalan dekerde yo. Işik aşkere kerd ke no enstîtu cipersyayişanê ilmî ra vêşêr zey rejîmê benate hereket keno. Işik da zonayen ke Zangehê Tûncelî alewitî serva dewlet û ‘Stratejiya Mîllî’ taloke vîneno û hewcedariyê asîmîlekerdişê alewiyan ano ziman. Hemserokê ADAD Mûrat Işik’î veng da sermiyanan û persa ‘Zangehê Tûncelî sazgehekê ilmî yo, ya zî merkezhe qirkerdinê kulturî yo?, ‘Biname kerdişê alewiyan zey ‘mîllî’, û ‘nêmîllî’ karê jew zangehî yo? kerd.
Alewitî kenê hedef
Mûrat Işik’î ard zon ke, Zangehê Tûncelî hewl dano ke zereyê çekuya alewitî tol bikero û niya dewam kerd: “Alewî û îtiqatê alewitî no welatî de zey jew mesele niyo, zey îtiqatanê bîn wayrê no welatî yo. Yê ke xerîbî yê, yê ke wayrê zihnîyetê jew jewî yê. Hemserokê ADAD da zonayen ke, AKP Rojhelatê Miyanî de ginayo linciya polîtîkayanê mezhebî miyan û nika zî verniya alewiyan de planê newî hadre kena.
Alewitiya girêdayê dewlet
Işik aşkere kerd ke jû hetî ra yê ke dûştê riza, edep û erkanî kewnê zereyê cemxaneyan, heta bîn ra bi rojan çormeyê cemxaneyanê ma gênê û wina va: “Heto bîn ra, AKP ya ke îbadetxaneyanê alewiyan cemxaneyan nêsilasnena û zey keyeyê îrfanî biname kena, heto bîn ra bi meaş dayişê pîran wazena alewitiya girêdayê dewlet înşa bikero. Işik’î peynî de hayr ant polîtîkayanê qirkerdin yê dewlet ser û niya va: “Wexto ke meseleyê Cizîr û Sîlopî rojdem de yê de, nê hewildayenê ke bin nameyê ‘hewcedariyê stratejiya mîllî’ yenê ramiten alewitî kenê hedef û hometa alewitî de şik û guman (qaxû) akenê. Işik’î peynî de veng da raya pêroyîn û waşt ke vera polîtîkayanê qirkerdinê alewiyan yê AKP de hestiyar bê.
DÎHA/ENQERA