Serokwezîro tirk Recep Tayyîp Erdogan meydanan de herresa keno. Îsraîl rexne keno. Çond reye kerdîsê hukumatê Îsraîl û yê Hîtler sanayî têver. Gorê Erdogan, Kerdîsê Îsraîl jê kerdîsanê Hîtler yê. Hatta zulmê Îsraîl tenena berz o. Yanî Îsraîl Hîtler ra jede xiravin o. Recep Tayyîp Erdogan hen qesey keno ke, ti vana nika qerar gureto, endî arteşa xo rusneno Îsraîl ser. La, pratîk de verva Îsraîl qeyta jû game nêerzeno. Çiyo niyanen qeyta era xo vîrî kî nêano. Zoneno ke şarê Rojhilatê Miyanî berz qeseykerdene ra haskeno. Na qeseykerdîs ra tepiya sene gamî yenê, raşt xêrê nî qeseykerdîsan çiko, nêhesebneno, vireniya xo nêvîneno. Şarê Rojhilatê Miyanî heyranê Zirçayîs yo. Şarê Rojhilatê Miyanî xoriyenya siyasetî ra famnêkeno. Na rîwal ra şarê Fîlîstîn teyna vatîsanê Erdogan hesneno û cirê heyraniya xo ano zon.

Mesela: şarê Fîlîstîn kerdîsanê Recep Tayyîp Erdogan yê verva kurdan ra bêxeber o. Ne Hamas ne kî El Fetîh derheqê Teretelê Roboskî de çiye nêvat. Nî rozanê peyenan de Mahmud Abbas ame, bî meymanê Recep Tayyîp Erdoganî. Abbas o dem vat “ma verva Kurdîstanê xoserî vejîme.” Mi zerrê nî 30 serranê peyenan de mesajê poştdayena rêxistinanê Fîlîstîn seweta kurdan caye nêwendî û nêhesnayî. Teyna waxtoke qadroyê PKK yê virenî şî Lubnan, jû rêxistina Fîlîstîn lewê xo de ca da ci. Qadroyanê PKK  na dem de verva Îsraîl da pêro û bî şehîd. Seweta Fîlîstîn. Ewro kî rêxistinê kurdî, na roza tenge de, seweta Fîlîstîn mesajanê poştdariye anê zon. Sempatiye kurdan seweta Fîlîstîn rameno. Onca bêrîme hukumatê AKP û meydanan de herresa Recep Tayyîp Erdogan ser. Hata na roze ne Recep Tayyîp Erdogan ne kî hevalanê xo seweta şarê Fîlîstîn tewa nêkerd. Serranê 70 û 80 şoreşgerê tirk û kurdî şî hewarê şarê Fîlîstîn. Dîndarê ke nika zirçenê, heştîranê sexte verdanê de, seweta Fîlîstîn jû kemere bîle nêesta. Hukumatê AKP dest de verva Îsraîl zaf îmkanî estê. La, verecoy Recep Tayyîp Erdogan, hukumatê AKP nêwazeno verva Îsraîl çiye bikero. Ma zoneme ke tekîliya Îsraîl û hukumatê AKP yê aborî zaf zaf xirt a. Derdê AKP kî hora perey yê. Çike sermiyanê AKP kî gonya şarê Fîlîstîn ra barê cenê. Mavênê Tirkiye û Îsraîl de peymanê aborî û eskerî estê. Hama hukumatê AKP nî peymanan xirave nêkeno. Eke xirave kero riskê Recep Tayyîp Erdogan birrîno. Coka hetê ra meydanan de Îsraîl rexne keno, hetê ra kî bankan de kontoyo xo fikrîno. AKP raştiye de era merdena domonanê Fîlîstîn ver nêkuno, seweta hukumatê AKP cizdanê azayanê hukumatî mûhîm o. La, serokê Bolîvya Evo Morales se kerd? Evo Morales peymanê mavenê Bolîvya û Îsraîl îptal kerdî, îsraîlizan rê vîze arde. Eke AKP wazena raştî poşt bido şarê Fîlîstîn, merdena domonanê Fîlîstîn bivindarno, gune peymananê eskerî yê mavênê Tirkîye û Îsraîl îptal bikero. La, hezar weşiyê Erdogan ke bibê, o qeyta jûye de mavênê xo û Îsraîl rîwalê Fîlîstîn ra xirave nêkeno.