Alişer serranê 1920 de verva polîtîkayê dewlete vejiyo. Demoke dewlete Qoçgîrî de dest kerd qetlîam, verva ci xoverdayene de ki rolê de girs yê Alîşer est o. Zarifa ke Qoçgîrî ra wa û Alîşer a zewjiya. Canûka de xirte biya. Verva siyasetê dewlete, Alîşer ra piya, hata roza merdene xoverda. 6'ê asma zimistana peyenê 1921 de bingê qetliamê Qoçgîrî ame bi estene. Dime ra bi hazaran kurdi elewî ameyî kistene, bi hazarî koyan de vêsan û tesaniye ra merdî. Adir estê dewan, kerdî xanûxirave. Zarifa, Alîşer û iyê ke xo qetlîam ra xelesnayî, restê Dêrsim. Werte ra serran verde ra, iyê ke terteleyan ra remê, Dêrsim de ameyî pêser. Serranê 1937-1938 de sire ameyî bî Dêrsim. Dewleta tirkî terteleyî de pîl ramit. 1937 de Alîşer û Zarîfa haziriye kerdene ke Dêrsim ra vejirê. Hama hetê Rayberê Qop û Zeynelê Topî ra zerrê esket de ameyî kistene. Alîşer û Zarîfa hata roza peyenê teslîm biyayene qebûl nêkerde. Kamî û îtîqatê xo rê wayir vejiyayî. Namê Alîşer û Zarifa bî namê xoverdayene, namê tekoşîne, namê roşt. Welatpawitoxê kurdî Alîşer û canûka xoverdayoxê Zarifa ewro Kobanê, Şengal, Kerkûk de ciwiyene. Xeylê terteleyî, xoverdayişî bî hama qomê kurdî benêkerd piya verva qetlîaman bivejiye. Hama ewro tornê înan Kobanê ra hata Şengal piya verva koletiye, verva zilm vejine. Kurdi ewro piya seweta ameyana xo tekoşine dane. Canûka Zarîfa adirê xoverdayiş kerd we, Sakîna guret o adir kerd kile û ewro ki Arîna ruyê wayis a kila xoverdayena ceniyan vilayê her ca kerd. Ewro her ca de virniya govenda serbestiye oncene. Ewro jû meterîs de Kobanê de beme Sibel Bulut, jû meteris de Şengal de bemê Vînar Semsûr. Cimê canûkanê kurdan pêro tariyan keno roşt. Na roşt rê wayir vejime. Na roşt ameyena ma wa, xo vîra mekerême. Xovîr ra mekerême Alîşer û Zarîfa, xovîr ra mekerême weşiya têdûst.
Meral KUCUK