Sûkeka Til Rifat ke Vakûrê Heleb de ya, 6 kîlometre dûrê Ezaz a û wayrê cayekê stratejîk a. Til Rifat ke heta nika destê çeteyanê Cebhet El-Nusra û Ehrar El-Şam de bî, roja Dişembe seatanê şan de, netîceyê operasyonekê eskerî de kewt bin qontrolê qûwetanê Ceyş El Suwar.
Kewtişê Til Rifat ra tepya Tirkiye kewt hereket
Badê xelesnayişê Til Rifat dewleta Tirk a ke kewt panîk destpa sereştişan kerd. Dewleta Tirk serva paştîdayişê çeteyan çend rojiyo bi obus û bombeyanê mîsket erzena heremanê Ezaz û Efrîn ser. Netîceyê nê êrişan de xeylê sivîlî kişiyay û bi desanê ci zî bî dirbetin. Rexmê vengdayişê peynîardişê êrişan yê Amerîka û Jûbiyena Awrûpa, Rûsya û Fransa Tirkiye sereştişanê xo ramena. AKP ya ke bi nayî ra sînor nêmend, çeteyan rê esker û cebilxane rişt û şî hawara ci.
4 qamyonî cebilxane şi El-Nusra rê
Dewleta Tirk ke wextekê derg o her hetî ra paşt dana çeteyan, no destegê xo ramena. Tewr peynî de dewleta Tirk kêberê sînor yê Babê El-Selam ra 4 qamyonî cebilxane rişt çeteyanê El-Nusra. Jew wezîfedarê kêberê sînorî ke ajansê ANHA rê qisey kerd, da zonayen ke, 13ê Sibat de, 4 qamyonî cebilxane kêberê sînor ê Bab El-Selam ra ravêrniya Sûriye û teslîmê çeteyanê El Nusra. Keso ke nêwaşt nameyê xo bido da zonayen ke ser cebilxane de muhrê MKE11D201-016 (Enstîtuyê Kîmya yê Makîne yê Tirkiye) estbi.
Serokwezîrê Tirkiye Ahmet Davûtoglû ke DAIŞ, El Nusra, Ehrar El-Şam zey rêxistinê terorîst nêvîneno, QSD û MSD zey rêxistinê çete biname kerd û va, heta ke ma înan biqedînê ma nêvindenê. Qiseykerdoxê Ceyş El-Suwar Ehmed El-Umer da zonayen ke, dewleta Tirk cayê ke çeteyan ra xelesniyay de, herbê çeteyan ramena û cayê ke qûwetê înan bi ca bî bombevaran kena.
Heto bîn ra, Konseyê Tîvarî yê Mîletê Jûbiyayî vizêr ser êrişanê dewleta Tirk yê verra YPG ronişten viraşt.
EFRÎN