Rapor seba qedênayîşê rojnamegerî yo

Weqfê Cigêrayîşê Sîyaset, Ekonomî û Komelî (SETA) hewteyo bîn raporêk eşkera kerdbi û bi raporê xo heme rojnamegeran hedef girewtbi. Derheqê raporê SETA de xeylê reaksîyonî amebî. Reaksîyonêk zî rojnamegere Ayşegul Dogane ra ame.

Dogane dîyar kerde ke no rapor seba deqkerdişê rojnamegeran ameyo weşênayene. Dogane va ‘bi raporî waşt ke rojnamegerîye biqedênî’ û wina domnaye: “Rojnamegerî karê xo şertanê zehmetinan de kenî. No rapor ver ez şaş nêbîya. Çimkî no rapor seba tersnayîşê rojnamegeran ame weşênayene. Rojanê peyênan de seba ke Tirkîya de dezgehê ke rojnamegerî bixebetyî nêmendî, rojnamegerî medyaya xerîbe de xebitîyayî. SETA seba ke bitersno, rapor eşkera kerd.”

Dogane daye zanayene ke hertim rojnamegeran ser o zext û hêrişî benî û wina va: “Tena şekilê hêrişan bedilîyeno. No welat de xeylê rojnamegerî kişîyayî.  Cok ra no welat de bedelê rojnamegerîye hertim giran bi. Mesela çend rojî verê Huseyîn Aykol tepişîya. Aykolî dîyar kerd ke o do zere de zî karê xo bikero. Nê rojanê peyênan de heme rojnamegerî hedef yenî girewtene. Vera nînan de rojnamegerî rayîranê alternatîfan gêrenî û ewja de piştî danî yewbînan. Ganî ma israrê xo yê domnayîşê mesleği û piştîdayîşyewbînanê xo zêde bikerî.”