3ê teşrîna peyêna 2015î de qezaya Nisêbînî ya Mêrdînî de roja 3. ya qedexeyê tebervejîyayîşî de cinîya bi nameyê Selamet Yeşîlmena 44 serrî wexto ke vernîya berê xo de bîye, amebî qetil kerdene. Yeşîlmene bi hawayo zanaye ameybî hedef girewtene û 2 domanê aye zî birîndar bîbî.
Raporê otopsî yê Yeşîlmene de amebî vatene ke ‘Yeşîlmene, netîceyê ginayîşê asinan yê wucûdê aye de şikîyayîşê esteyan ver û birîndarbîyayîşê organanê zereyî ver merda’. Îfadeyê şahidanê hedîseyî de ameyo vatene ke sîlehî kura ra panîyayî, labelê dosya de hîna gamêk zî nêerzîyaya.
Yeşîlmene seba ke nan bipewjo vejîyabî vernîya berê xo û netîceyê panîyayîşê sîlehan de birîndar bîbî. Seba ke ambulanse erey amebî, demêko derg erd de mendbî. Dima ra demêk mîyanê ambulanse de amebî vindarnayene. Yeşîlmene şîyayîşê gonîya zêde ver merdbî. Avûkatan hedîse ser o gerre kerdbî. Herçiqas ke hedîse ser ro 3 serrî derbaz bîyî zî, heta nika netîceyêk nêameyo girewtene.
JINNEWS / MÊRDÎN