“Na cografya de her pîrê ocaxî talîbê ci îqrar danî yewbînan. Raştîya ma îqrarî ser o ya. Nê erdan de dare, awe, herre, adir, verge, mîlçike û kêzike heme mana vînenî û ma endamê bawerîyêka winasî yî.”
Aktîvîteyê Vîrardişê Duzgun Babayî yê 15. ke her serre bi hawayo sistematik virazîyenî, emser zî Cemxaneyê Duzgun Babayî de bi vilakerdişê loqmeyan dest pêkerd.
Hewteyêk verê programê aktîvîteyan amebi eşkerakerdene û goreyê ci Cemxaneyê Duzgun Babayî de vîrardiş ame kerdene. Vîrardiş de çirayî seba domanê bi nameyê Nûpelda û Ayazê ke çend rojî verê netîceyê teqayîşê mayînî de merdbî, ameyî tafînayene û seba her di domanan duayî ameyî kerdene.
Çarçewaya vîrardişê Duzgun Babayî de Cemxaneyê Duzgun Babayî yê Pulurî de tayê aktîvîteyî ameyî viraştene. Xeylê hetan ra kesî, hunermendî û pîrê ocaxan beşdarê aktîvîteya vîrardişî bîyî. Serekê Komeleya Cemxaneyê Duzgun Babayî Sînan Kirmiziçîçekî qiseykerdişê akerdişî kerd.
Kirmiziçîçekî va ‘ma seba vîrardişê Duzgun Babayî ameyî têhet’ û wina domna: “Ma çira û duayê xo seba Nûpelda û Ayazê ke netîceyê teqayîşê mayînî de merdî kenî. Xeyal û zerrîya înan do hertim rayîrê ma roşin bikerî. Ma ewro seba rayîr, erj, ziwan û kulturê xo tengî de yî. Ma seba hurmetê înan taqîbkarê înan î.”
Kirmiziçîçekî dewamê qiseykerdişê xo de wina va: “Na cografya de her pîrê ocaxî talîbê ci îqrar danî yewbînan. Raştîya ma îqrarî ser o ya. Nê erdan de dare, awe, herre, adir, verge, mîlçike û kêzike heme mana vînenî û ma endamê bawerîyêka winasî yî. Ma demokrasî, edalet, seyyewbînanî, azadîye û aştîya rûmetine wazenî. Her mîlçike bi ziwanê xo wanena û her vaş kokê xo ser o keşke beno û ma do bi no qeyde pêro pîyatîya xo xurt bikerî.”
Qiseykerdişan ra dima loqmeyî ameyî vilakerdene û meymanî ver bi zîyara Duzgun Babayî rayîr kewtî.
PÎRHA/DÊRSIM