Aşmanê zimistanî de doman, extîyar, diganî û yê ke nêweşîya zerrî, tansîyon, şeker, qesebeya sîya û gurçike înan reyde esta, ganî vera nêweşîya serdgirewtişî, grîp, sînuzît, bronşit, zature û sewbîna nêweşîyanê winasî de baldar bibî.Nêweşxaneyê Şîşlî yê Memorîalî de Beşa Nêweşîya Zereyî ra Doktoro Pispor Ozgur Mollaogluyî derheqê rayîrê xo pawitişî yê nêweşîyanê zimistanî ra de zanayîş da.
Spor bikerê
Mollaogluyî qiseykerdişê xo de va ‘seba vera nêweşîyan de bihêzkerdişê bedenî, gama sifteyîne pratîzekerdişê stratejîyê cuyayîşî yo’ û qiseykerdişê xo wina domna: “Cixare û çîyê tutunî yê bînî û alkolî ra dûrî mendiş muhîm o. Rojane bi hawayo nîzamin kerdişê sporî sîstemê bihêzkerdişê bedenî de zaf tesîrin o û no zî xeylê reyan ameyo îspatkerdiş. Cok ra aşmê zimistanî ke dîyayîşê rîskê enfeksîyonî tede xeylê zaf o, ganî merdim kerdişê sporî rê mabên nêdo, bi hawayo nîzamin kerdişê sporî bidomno. ”
Mollaogluyî qiseykerdişê xo de bale ant wextê rakewtişî ser û wina dewam kerd: “Seba ke bedenê merdimî hîna qewetin bibo, ganî xo bêhewn nêverdo. Keso ke ciwan ganî roje de tewr kêmî 7-8 saetan rakewo. Wextê rakewtişî de eştişê zerrîye, basincê gonîye û hûmara hilmgirewtişî kêmî beno.
Vîtamînan bixebetnê
Mollaogluyî qiseykerdişê xo de qala xebetnayîşê vîtamînan kerd û enê zonayişan da: “Xebetnayîşê sebze, meywe, mineral, Selenyum û vîtamînanê A, C, E û B zî muhîm ê. Demê peynî de zaf cigêrayîşê ke kêmanîya vîtamînê Dyî beno sebebê nêweşîyanê zimistanî, ameyî viraştiş. Rayîrê berzkerdişê vîtamînê Dyî yê tewr asan tîje verde vindetiş o. Eke no mumkun nêbo o wext merdim eşkeno vîtamînê Dyî teqwîye bikero.“
Doktoro Pispor Mollaogluyî dîyar kerd ke nê demanê peyênan de bi vatişê ‘nebatî hêzê pawitişî yê bedenî qewetin kenî’ rotişê nebatan zêde bîyo û qiseykerdişê xo wina qedêna: “Her çiqas ke ameyo îspatkerdiş ke nebatê hêzê pawitişî yê bedenî gird kenî zî, mîyanê nebatan de yê ke tesîro nêbaş kenî zî estî. Ganî merdim doktorê xo ra bişewirîyo û dima ra nebatan bixebetno. Çaya keske, sîr û mastê probîyotîkî, saya mîkroorganîzmayê feydeyin û proteînan bedenê merdimî hîna qewetêr beno.”
NAVENDÊ XEBERAN