Wexto ke pêvînayîşê butçeye ameyênê dîyayîş, seba ke Parlamenterê HDPyî yê Rihaye Osman Baydemîrî vateyê ‘Kurdistan’î şuxilnabî, bi hawayo demkî Meclîs ra amebî vetiş û 12 hezar lîra zî cezaya pereyî dîyabî ci.
Babete ser o Parlamentera HDPyî ya Wanî Bedîa Ozgokçe Ertane qisey kerde û vera na rewşe de reaksîyon nîşan daye. Ozgokçeye va ‘senî ke ewro bi nameyê Trakya de yew herême esta, Kurdistan zî esto. Bi no hawa henekê xo bi aqilê merdimî kenî. Yê ke Meclîsî awan kerdî mîyan de parlamenterê Kurdistanî zî estbî. AKP û MHP bi hawayo şîrik vera tarîx û şaranê Kurdistanî de bêrezîye kenî.”
Ozgokçeye dewamê qiseykerdişê xo de wina va: “Vateyê Kurdistanî teberê tuzigî de dîyayîş, netîceyê zîhnîyetê qedexekarî yo. Serranê 90 û 2013î de Serekkomar Erdoganî xeylê reyan mefhûmê Kurdistanî şuxilna. Erdoganî o wext sebebê bikarardişê vateyê Kurdistanî zî îzeh kerdbî.”
Ti manaya qedexeyan çin a
Ozgokçeye dîyar kerde ke Baydemîr bi nizdîbîyayîşêko faşîzan reyde têrî mend û wina qedêna: “Herkes zano tuzigo zereyî çira bedilîya. HDPyî berajê se ra 10î derbaz kerd û nika seba ke HDP û şarî yewbînan ra biqerfnî, wina kenî. Ti manaya nê qedexeyan çin a. Yê ke vateyê Kurdistanî çinî hesibnenî, raştîya xo de estena şarê kurdî çinî hesibnenî. Redkerdişê Kurdistanî, redkerdişê estena kurdan o. Ma nê zîhnîyetê nêweşinî qebul nêkenî.”
JINNEWS/ WAN