Bimbarekînê tewr gird ê Roja Karkeran ê Dinya yê Kurdistan û Tirkîye Amed, Stenbol, Enqera û Îzmîr de virazîya. Bi se hezaran Karkerê ke vejyay meydanan û emegwerdan rê vatî Nê.
Sûkanê Vakûrê Kurdistan de bi des hezaran gurekarî herikyay meydanan û vatî ’Nê, hona nêqedîya’ day. Bimbarekîna Amed Meydanê 5ê Hezîran (Meydanê Îstasyon) de virazîya. Meydanê bimbarekîn de panqartê “Nê hona nêqedîya, têkoşîn rê dewam”, “AKP do hesap bido şarî” “Bicuwe Serok Apo” aliqîyay. Herzewbîn sloganê “Bi xoverdayîşî ma dê serbikewê berz bî.
Ma dê bibê yewe
Hemserokê BES yê Şûbeyê Amedî Bedîrxan Çetînkaya ke ser nameyê Komîteyê Amadekar qisey kerd û vist vîrî ke Kurdistan de 1ê Gulane bin zext û zorvajîye îxtîdara siyasî de bimbarek bena. Çetînkaya aşkere kerd ke iyê dê her tim dûştê faşîzmî de meydanan de têkoşîna xo dewam bikerê. Bedîrxan Çetînkaya hayr ant îxrackerdişê gurekaran ser û wina va: “Kedkar û gurekarî dê hesap pers bikerê. Referandûmî de yê ke serkewtî emegdar, çepgir, sosyalîst, kurd, Nisêbîn, Şirnex û Gever o. Yê ke wazenê ma çin bikerê ma dê dûştê înan de bibê yewe û vengê xo berz bikerê.
Serokwekîla DBP Gulcîhan Şîmşek, Parlementer Feleknas Ûca, Endamê Konseya Navend yê Odeyê Tabîpan Doxtor Şehmus Gokalp, Hemserokê Odeyê Tabîpan yê Amedî ke ame îxrackerdiş Yakûp Altaş zî bimbarekîn de qisey kerdî û hayr antî polîtîkayanê pelçiqnayîşê civakî yê îxtîdar ser. Qiseykaran ardî ziwan ke AKP ser werdişê emegê karkeran de hewl dana rejîmeke xo rono. Herzewbîn mesajê “Berzkerdişê têkoşîn, ronêdayîşê çokan” û “yewîya quwetê karkeran” amê dayen.
Meydanê Sey Riza de bimbarek kerdî
Bimbarekîna Dersim Meydanê Seyîd Riza de virazîya û bi hezaran kesî tewr bî. Bimbarekîn de panqartê “Bicuwe 1ê Gulane” abîya. Vindertişê hurmetî ra dima Endamê Komîteyê Hadreyîn yê Egîtîm Senî Suleyman Gulerî qisey kerd û vist vîrî ke pêrokîn dinya û Tirkîye de şert û mercê gurekaran her ke şino benê giran. Gulerî ard ziwan ke AKP bi OHAL û KHK hewl dana rejîmî biramno û dûştê nayî de hayr ant rolê têkoşînî ser.
Parlementerê HDP yê sûk Alîcan Onlu ke bi Kirmanckî destpa qiseyanê xo kerd zî 1ê Gulane bimbarek kerd. Onlu vist vîrî ke verîya coy AKP pêrokîn bêhiqûqî û nêheqîyan bi îtîfaqê cematî viraşt û va nika zî bi îtîfaqê MHP, walî û qeymeqaman virazena. Alîcan Onlu aşkere kerd ke Walî wekîl û walî nîyo, serokê îtîfaqê MHP-AKP yê sûkî yo. Xespkar o. Hidir Demîrî ser nameyê Yewîya Quwetî, û Şukran Yilmaz zî ser nameyê DÎSKî qisey kerd û mesajê xoverdayîşî day. Hemşaredarê sûk Mehmet Alî Bûl ke Girotxaneyê Kandira yê tîpê Fe de yo zî seba bimbarekînî mesajeke ruşna. Herzewbîn sûkanê bîn yê zey Wan, Batman, Sêrt, Mêrdîn, Colemêrg, Qers, Riha, Semsûr, Dîlok û xêlê cayanê bîn de 1ê Gulane bimbarek bî.
Bi mîlyon reyî nê
Stenbol de mitîngê 1ê Gulan Meydanê Bazarê Şar ê Bakirkoy de virazîya. Karker û emegdarî pêşengîya KESK, HDP, CHP, DÎP, EHP, SEP, KOZ, TTB, BHH, Dîvrîgî Kultur, EMEP, Malên Gel, Kaldiraç, TKH, Hereketê Cinîyan û xêlê sazgehanê civaka sivîl de Vindertişê Încîrlî Dîkîlîtaş de are bî. Gurekarî bi pêşengîya DÎSK, TMMOB, KESK û TTB de zî ver AVM ya Marmara Forum de are bî. Bi hezaran polîsî Meydanê 1ê Gulane de amey wezîfedarkerdiş.
“Nê têkoşîn nêqedîya”
Gurekaran bi slogan, panqart û dowîzan ver bi Meydanê Bakirkoy destpa rayşîyayîş kerdî. Meydanê mitîngî de zî bi des hezaran gurekarî are bî. Meydan de sloganê “Nê hewna nêqedîya, nika destpê keno”, “Nê têkoşîn nêqedîya” berz bî. Nûmayîş de Hemserokanê HDP Selahattîn Demirtaş, Fîgen Yuksekdag û wekîlanê tepişteyî yê HDP rê selam rişnîya. Qiseyan de zî vera rejîmê kedwerdişî yê AKP mesajê dewamkerdişê têkoşîn ame dayen.
Bimbarekîn bi wendişê çerxa enternasyonalî destpa kerd. Dima ra temsîlkaranê rêxistin, sazgeh û fraksîyonî vejyay ser sehne û karkeran selamî kerdî. Serokê DÎSK Kanî Beko’yî xîtabê çalakgeran kerd û vist vîrî ke dîktatorê faşîst nêşkeno vengê înan bibirno. Hemserokê KESK Lamî Ozgen’i zî dîyar kerd ke ê wertaxê ameyena welatî yê û reyna xîlebaz û xirsizan rê va nê. Bimbarekîn de îzahatê wertex bi kurdî û tirkî ame wenden. Îzahatî de vajîya ‘Nê nêqedîya, hona nika destpa keno, nê ma serkewtî’. Heto bîn ra Stenbol de 100 ra vêşêr karker û gurekarî girotîyay binçiman.
“Bi înadî haştî”
Çalakîye 1ê Gulan yê Enqera, ver Îstasyono ke qetlîama 10ê Cotmeh virazîya da destpa kerd û heta Meydanê Kolej dewam kerd.
Gurekaran bi vîrardişê qûrbanîyanê qetlîama 10ê Cotmeh destpa çalakî kerdî. Malbatê ke qetlîama 10ê Cotmeh de mordemê xo kerdî vinî û yê ke qetlîam de bî dirbetin tewrê çalakî bî û slogana “Bi înadî haştî” kerdî berz. Egîtîm Sen, Wendekarê Zangehî û Malimê ke amey îxrackerden pîya kortej de cayê xo girewtî. Çalakîya Îzmîr zî Meydanê Gundogdu de virazîya. Manîsa, Aydin û bi desan sûkan de gurekaran roşanê xo meydanan de bimbarek kerd û mesajê “Şerî rê nê, emekdaran rê butçe”, “Yewîya karkeran do sermayeyî binbivisto” day.
NAVENDÊ XEBERAN