Aşma Remazanî ya emserî 24ê nîsane de dest pêkena. Rîyê pandemîya Covid-19î ra welatê Rojhelatê Mîyanênî emserre keye de yê. Coka emserre aşma Remzanî de fitaro pîya, nimajo komkî û zîyaretê şaristanan ê fîrazan ê îslamî do nêrê kerdiş. Heta nêmeyê şewe de dostî zî do nêeşkê kom bibê. Erabîstano Sûîd, Misir, Lubnan, Surîye, Fas û Tirkîye de reya verêne Remazan do bi nê hawayî bêro pêşwazîkerdiş. Muezzînê Mekke Alî El Mollayî AFPyî rê qise kerd û vat: ''Ma musayî yê ke camîyo pîl tim pê merdiman pir bi. Rewşa nikayêne seba merdiman zaf giran a.'' Hewteyanê peyênan de Kabe zî bêveng o. Selahîyetdaranê Erebîstanê Sûîdî seba ke verê vilabîyayîşê Korona bigêrê zîyaretê Mekke û Medîne vindarnayî. Yeno vatene ke zîyaretê seba hacî zî hetê Erabîstanê Sûîdî ra emserre do bêro astengkerdiş. Îdareyê Rîyadî vengê muslimanan da ke amadekarîya xo ya seba zîyaretê Mekke taloq bikerê. Goreyê Rêxistinê Weşîye ya Dinyaye, tedbîrê mendişê keyeyî de seba girewtişê rojeyî asteng nîyo la rêxistinê muslimanan rê pêşnîyaz kerd ke verî ke roje bigêrê fikranê doktoran bigêrê. MERKEZÊ XEBERAN