Babete ser o şerwanê ke mîyanê Tabûrê Enternasyonalî de ca gênî, qisey kerdî.
Ma do serbikewî
Şerwan Abuzer Goçerî va ‘ma do tesilî serbikewî’ û qiseykerdişê xo wina domna: “Merhaleyo yewine ya hemle zaf bi serkewte vîyart. Kesê ke operasyonî de ca gênî, mîyanê înan de ereb, kurd, tirkmen û suryanî estî û heme zî vera DAIŞî de ameyî têhet. Hemleya vera DAIŞî yena manaya vera hukmatê AKP û Erdoganî zî. Ma vera DAIŞî de goreyê stratejîya xo yê çarçeweya şoreşê herême de şer kenî. Reqqa merkezê çeteyanê DAIŞî ya. Eke Reqqa bêro girewtiş o wext ameyeyê kantonanê Rojawanî zî keweno bin temînatî. Şoreşê Rojawanî yeno manaya bihêzbîyayîşê şoreşê Bakurê Kurdistanî û Tirkîyaye.”
Cinîyî do azade bibî
Şerwana cinîye Sefagul Arslane zî dîyar kerde ke ‘ma do cinîyê ke bin zulmê DAIŞî de yî, azade bikerî’ û va: “Şerwanê enternasyonalîstî yew serre û nîm o beşdarê heme hemleyê ke Rojawan de yenî viraştiş, benî. Sey şerwanê şoreşê Tirkîyaye beşdarbîyîşê nê têkoşînî seba mi rûmetêko pîl o. Eke Reqqa bêro girewtiş, o wext bingeyê şoreşê Rojawanî hîna sexlem beno. Çeteyî nêeşkenî xover bidî. DAIŞ tewr zêde dişmenê cinîyan o sey yew cinîye beşdarbîyîşê nê têkoşînî seba mi şansêko gird o. Eke Reqqa bikewo do kewtişê dîktatorîya Erdoganî ser o zî tesîr bikero.”
Çeteyî do reqqa de binkewî
Şerwanê Hêzê Azadîya Pêrabesteyî (BOG) ke mîyanê taburê enternasyonalî de ca gêno, bal ant beşa mîyanneteweyî ya hemleya Reqqa ser û wina va: “Merhaleya yewine ya hemle hawayo serkewte vîyart. Ti vîndîbîyayeyê ma nêbî. Averşîyayîşê ma dewleta Tirkîya eciz kerdo. Çimkî Tirkîyaye Reqqa sey xeta xo ya sûr îlan kerdbî û averşîyayîşê ma ver Tirkîya kewena halêko faşîzan. Çeteyî do binkewî û yê ke piştî danî çeteyan, do ê zî çeteyan reyde binkewî.”
SÎNAN DENÎZ / ANF / REQQA