Zîndananê Tirkîya û Kurdîstanî de bi hezaran hepsîyî estî û nê hepsîyan mîyan de reyna bi seyan hepsîyê nêweşî estî. Nê hepsîyanê nêweşan ra zî bi desan hepsîyê ke nêweşîya înan giran a û nêşênî zîndan de bimanî estî.
Sereka Komeleya Heqanê Merdiman a Anqara Nuray Çevîrmene ANFyî rê qisey kerde û derheqê rewşa hepsîyanê nêweşan ê Herêma Anatolîyaya Mîyanêne de melumatî dayî. Çevîrmene daye zanayene ke seba hepsîyanê nêweşan ê ke nêşkenê heqê xo yê dermankerdişî bixebitnê, ê muracatê xeylê sazgehan kenê, labelê netîceyêk nêgênê.
Çevîrmene va ‘bi piştîdayîşê Odeya Tabîban a Enqere, ma serra 2018 de derheqê hepsîyanê nêweşan de raporêk amade kerd’ û wina dewam kerde. “Ma no rapor Komîsyonê Cigêrayîşî yê Heqanê Merdiman ê Meclîsî, Wezaretê Edelatî, Mudirîya Hepisxaneyan û Wezaretê Weşîye rê erşawit. Cewab aşmêk dima ame dayene. Cewabo ke yew wexto kilm de ame dayene de rapor ser o nêame vindetene. Seke nêweşîyêka girane çinêbo, wina bi lezûbez cewab dîya ma û no zî hesasîyetê înan nîşan dano ma. Seba ke hepsîyî nênê dermankerdene, zafaneyê nêweşan wefat kenê. Goreyê doneyanê şeş aşman destpêkê serra 2016î zîndananê Tirkîya de 2 hezar û 300 kesî wefat kerdî, labelê derheqê sedemê mergê înan de zanayîşî nêameyî girewtene.”
ANQARA