Li Taxa Zerdeşt a Serêkaniyê Yekîtiya Star, ji bo nirxandina geşedanên dawî civîna jinan lidar xist. Civîn bi deqeyeke rêzgirtinê destpê kir. Piştre Endama Yekîtiya Star Nûrcan Heqî axivî. Heqî, bal kişand ser geşedanên dawî li Sûriyeyê û Rojavayê Kurdistanê. Heqî, diyar kir ku geşedanên li rojava bandora xwe li her  parçeyên Kurdistanê dike û rola jinan di nava şoreşa Sûriyayê de pir mezin e. Heqî di axaftina xwe de da zanîn ku jinên Sûriyayê rola sereke di şoreşê de girtiye û bi taybet jinên Kurd li Rojavayê Kurdistanê ku di hemû qadan de kar û xebatê dikin.Heqî, biryarên ku Meclisa Gel a Rojavayê Kurdistanê (MGRK) di derbarê jinan de standine bi bîr anî û got ku MGRK’ê biryarên wek qedexekirina zewaca jinan bi darê zorê û di temenên biçûk de, mafên jinan e. Di dawiya civînê de Nûrheq bersiva pirsên jinan dan.


Armanca çavtirsandinê
Ji aliyê din ve Yekîtiya Star li bajarê Efrînê jî bi amadebûna Endama Desteya Bilind a Kurdî Ilham Ehmed û bi dehan jinên bajêr li navenda Saziya Malbatên Şehîdan, civînek berfereh lidar xist.
Civîn bi deqeyeke rêzgirtinê destpê kir. Piştre Endama Desteya Bilind a Kurd Ilham Ehmed ji beşdaran re rewşa dawî ya Sûriyê û Rojavayê Kurdistanê ravekir. Ehmed, bal kişand ser êrîşên li ser taxên Kurdan ên Helebê û got: "Êrîşên li ser taxên Şêxmeqsûd û Eşrefiyê ji aliyê komên girêdayî rejîma Baasê bi awayekî plankirî û bi armanca çavtirsandina gel çêbûne.’’
Ehmed, ji gel xwest ku xwedî li berxwedana YPG derkevin û deskeftiyên şoreşê biparêzin û di dawiya axaftina xwe de banga hişyariyê li hember lîstik û kiryarên van komên çete li gel kir.Civîn bi bersivdayîna pirsên beşdaran bidawî bû.

 ANHA/SERÊKANIYÊ-EFRÎN