Perîşan Ozluye ke nika 65 serreyî ya, cuya xo de zaf dejê girdî antî. Vera îşkence û zextê dewlete de serra 1993 de bi keyeyê xo Colemêrg ra koçê merkezê Wanî bena. Mêrdeyê Ozluye îşkence ver mireno û lajê ci zî seba heyfgirewtişê pîyê xo beşdarê PKKyî beno û o zî şer de şehîd keweno. Perîşane qala cu, îşkence û zextê ke vînayî kerde.
Perîşane qiseykerdişê xo de wina va: “Rojê ke ma garanê xo ditêne. Xebere ameye û vatî ke leşker do bierzo dewe ser. Ma şîyî mîyanê dewe lajê min yê şenik Harun dergûş de rakewte bî. Mi lajê xo girewt û ez vejîyaya. Leşkeran hêrişê ma kerdî û orteyê dewe de heta şewe îşkence bi ma kerdî. Dewijî îşkence ra nêameyêne şinasnayîş. Dima ra ma heme dewe ra koç bîyî. Tayê zî firsendê koçî daxî nêvînayî. Mîyanê înan de mêrdeyê mi zî estbî. Badê ke ma heme dewe ra koç bîyî lajê mi Mazlumî agêra dewe. Agêrayîş de 4 laşî mîyanê gonî de vîna. Seba ke bêrî şinasnayîş lajê mi rîyê înan şuweno û vîneno ke pî û datê ci yî.
Ma şikefte de cuyayî
Perîşane qiseykerdê xo wina qedênaye: “Ma 10 rojî şikefte de cuyayî û dima ra ma koçî Wan bîyî. La tîya de zî ma zilm ra nêxelasîyayî. Mêrdeyê mi 10 rojî badê ke ma koçî Wan bîyî dest bi qelibnayîşê gonî kerd û mêrdeyê mi qelibnayîşê gonî ver merd. Lajê mi Mazlum zî badê mergê pîyê xo nêeşka bêveng bimano beşdarê PKKyî bî û ma xeberê şehadetê ci eşnawit. Dewlete va qey do kurdî pê kiştiş bêrî qedênayîş la ma nêqedîyayî. Rewşa nikayin zî sey serranê 90î ya.”
ŞÛJIN / WAN