Teyareyanê artêşa tirk 28ê Kanûne 2011î ser xeta sînor de bombe vorna dewijanê Roboskî ser û 34 kesan qetil kerd. Badê 4 û nîm serran dewleta ke hona hesabê na qetlîam nêda, şewa vêrî eynî ca de bi topan êrişê dewijan kerd. Quwetanê dewlet ke Fermandarîna Bêjûh ra topî eştî Roboskîyijê ke ser xeta sînor de bî ser, gencê bi nameyê Vedat Encu qetil kerdî. Herzewbîn 5 kesê bînî zî giran bî dirbetin. Roboskîyijê ke qetlîam hesiyay pê, verê xo day hetê sînor. Dewijê ke hona dirbetê qo yê qetlîama 28ê Kanûne derman nêkerdîyê, dewlet rê hêrs û nêrazîbiyen damusnay.
Mesaj day şarê kurd
Parlamenterê HDP yê Şirnex û mexdûrê qetlîama Roboskî Ferhat Encu aşkere kerd ke hewldayenê qetlîama diyîn bi plan û zanabîyen virazîya û da zonayen ke bi nayî şarê kurd ra mesaj day. Encu ke êriş zey diyîn qetlîama Roboskî biname kerd da zonayen ke mesajê “Senî ke mi 34 kesan qetil kerd û hesabê ci nêda, eynî ca de û eynî şiklî ez şima qetil kena û hesabê ci nêdana” yeno dayen. Parlamenterê HDP vist vîrî ke rixmê talokeyê cuwyanî reyna nêverday ke ambûlansî şirê herem û verra pêrokîn qirkerdinanê dewlet veng da şarî ke nêrazîbiyen damusnê.
Heto bîn ra, cenazeyê Vedat Encu ke netîceyê topvaran de qetil bi badê otopsî berdiya dewa Roboskî. Wextê berdişê cenaze de wesayîtanê eskeran şêligî tacîz kerd, ser nay welatijan sî (kemer) vornay wesayîtanê zirxî û nêrazîbiyen damusnay. Cenaze badê ca ardişê wecîbeyanê olî bi bi merasîm û sloganê ‘Kiştox Erdogan’ mezelxaneyê dew de defin bî. Quwetanê dewlet nêverday ke cenaze mezelxaneyê Şehîdanê Roboskî de bîro definkerden. Merasîmê cenaze de hikûmeta AKP rê nêrazîbiyen damusnîya.
DÎHA/ŞIRNEX