RIFAT ŞAHÎN / LEZGÎN AKDENÎZ / MA/AMED
Qezaya Sûrî ya Amedî de rijnayîş dewam keno. Çend rojî verê Endamê Platformê Bîraradayizî Sûr de tayê cigêrayîşî viraştbî û derheqê cigêrayîşê xo de dîyar kerdî ke ganî demokratî demêko rewêr seba wedarnayîşê OHALî bêrî têhet û têkoşîn bidî.
Endamanê Platformî ra nuştoxe Oya Baydare va ‘wezîfeyê dewlete kiştiş nîyo, cuyayîş û viraştiş o’ û wina dewam kerde: “Dewlete nê wezîfeyanê xo nêana ca û berpirsîyarê heme rijnayîşan o. Sera 10ê pereyo ke seba şerî yeno xerckerdişî reyde merdim şêno Sûr biaçarno cayê cuyayîşî. O wext Serekwezîr Davutogluyî vatbî ma do ‘Sûr bikerî Toledo, hetta ez zî do tîya de banêk bigîra’. Ez înan dawetê tîya kena. Wa bêrî tîya ra biewnî. OHAL yeno manaya rijnayîş û veşnayîşî. Amed qelbê herême, Sûr zî ruhê herême yo. Ez donemo nizdî ra zaf hêvîdare nîya, çimkî Tirkîya wina bi hawayo asan nêşêna biagêra demokrasî ser de. Ganî herkes seba wedarnayîşê OHALî bidekewî têgêrayîşî mîyan.”
Parlamenterê HDPyî yo kehen Levent Tuzelî zî wina va. “Ewro komel de parçebîyayîşêk esto û ti kes nê parçebîyayîşî qebul bikero. No rijnayîş çareserîyêk nêano. Raştîya de no rijnayîş do ameyoxe rê şopê kûrî biverdo. Ewro waştişê ortax o yo ke wa OHAL bêro wedarnayîş. Ganî ma seba vernîgirewtişî heme têkoşîn bidî.”
Wa demokratî bêrî têhet
Sereka Pêroyî ya ANAPî ya kehene Nesrîn Nase zî dîyar kerde ke seba xelisîyayîşê probleman ra ganî cepheyo demokratîk bêro têhet û wina va: “Heta ke OHAL nêro wedarnayîş, çîyêk nêbeno. OHAL hesaban ra seba ewleyî ame awankerdiş, labelê sifreyê ke ser o nane kêmî bibo, ewja de ewleyîye nêronîyena.”
Prof. Dr. Gencay Gursoyî zî va ‘ez rijîyayîşê qezayêka tarîxî ver dejena’ û wina domna: “Ez hêvî kena ke neslo ameyox hesabê nê rijnayîşî biperso. Nika çend keyeyî mendî û xover danî. Tîya de gamê newekerdişî nînî eştiş.”