Taxa Alîpaşa ya qezaya Sûrî ya Amedî de hetêk ra rijnayîş dewam keno, heto bîn ra zî xoverdayîşê şarî domîyeno. Bi talîmatê Wezîrîye seba rijnayîşî heme rayîrî yenî cerebnayîş. Na çarçewa de bi aşman o cereyan û awa taxe ameyî birnayîş û taxe bîya zîndanêko akerde.
Babete ser o cinîya bi nameyê Hatun Tulaya ke taxe de ronîşena, qisey kerde.
Tulaye vera rijnayîşan de reaksîyon nawite û wina domnaye: “Mi ra wazenî ke ez keyeyê xo seba 3 daîreyan bida. Tîya keyeyê min o û cayê cuyayîşê min o. Tîya keyeyê ke ê bidî mi ra hîna weşêr o. Eke ê vanî qey ez do keyeyê xo bida û şêra keyeyanê înan, ê şaş î. Ez herinda ke mîyanê ê keyeyanê betoninan de bimana, ez do biagêra dewa xo û ewja de bicuya.”
Tulaye qiseykerdişê xo de bale ante ser tehdîtanê polîs û zabitayan ser û wina va: “Ez herinda ke keyeyanê înan de bimana, ez mirena hîna baş o. Ez keyeyê xo nêverdana û nêvejîyena. Mi verê cû 2 reyan reya xo da AKPyî û verê cû mi zaf bawerîya xo bi AKPyî ardêne. Wexto ke ê vatî ciwanan Sûr veşnayo, mi bawer kerdbî, labelê ez ewro vînena ke raştî wina nîya. Nê hukmatî awa kesê ke destmaj bigî û nimaje bikerî, birna. Ganî kurdî nê kayî xira bikerî. Wa ma ra dûrî bivinderî. Ez vera nê rijnayîşan de veng dana heme şarê Amedî wa bêrî Sûr.”
Cinîyan ra Hasîneya ke 45 serrî yo ke Sûr de cuyena, wina va: “Dewlete seba ke zulmê welatîyê xo bikera esta an seba başîya welatîya xo kar kena. Verê awa mi birnayî, nika zî hêrişê ma kena. Ma veng danî şarî wa bêrî Sûr.”
ANF/AMED