MEDÎNE MAMEDOGLU / JINNEWS/AMED
Qezaya Sûrî ya Amedî ke 2ê Kanûna 2015î de qedexeyê tebervejîyayîşî amebî îlankerdiş, 2 serrî yo ke bi rijnayîş dewam keno. Heta nika 6 taxanê Sûrî ra 4ê ci bi temamî ameyî rijnayîş. Taxa Dabanogluya ke ewil girîyaye çarçewaya qedexeyî û dima ra qedexeyê ci wedarîyabî, nika zî amadekarîya rijnayîşî tede yeno kerdiş.
Polîsî taxe de gêrenî û çend keyeyê ke taxe de mendî, înan tehdît kenî. Polîsan taxijan rê heta 5ê kanûne wext dayo. Mîyanê 2 serranê peyênan de nizdîyê 30 hezar merdimî mecbûr mendî Sûr ra koç bikerî. Eke taxa Dabanoglu zî bêro rijnayîş, hûmara taxa talankerdeyan resena 8.
Babete ser o taxijî qisey kerdî. Taxijan ra Esma Dîkçîye va ‘eke ez keyeyê xo biterikna, do bêrîkerdişê mi zêdeyêr bibo’ û wina dewam kerde: “Wextê pêrodayîşan de ez Taxa Fatîhpaşa de bîya û ez keyeyê xo ra nêvejîyayêne. Labelê înan bi zorî mi vete. Hende qetlîyaman ra dima nika zî ez şahidîya rijnayîşî kena û mi rê giran yeno. Ma şîbî sewbîna ca, labelê hesreta tîya ma de tesîr kerdbî û ma agêraybî keyeyê xo. Labelê nika zî wazenî ma bidî koçkerdiş. Şopê xoverdayîşî taxe ra bêrî pakkerdiş zî hişê merdiman ra nînî pakkerdiş. Bi hewteyan hewn nêkewt çimanê mi. Domanîya ma û vîrardişanê ma çinî kerdî. Ma zî tede herkes vera nê qetlîyamî de bêveng mend.”
Her roje yew keye, yew ziqaq…
Dîkçîye peynîya qiseykerdişê xo de wina va: “Nika teblîgatêk dayî ma û ma ra wazenî ke ma heta ke 5ê kanûne taxe biteriknî. Ê se bikerî zî ma do keyeyê xo nêteriknî û ez do tîya de bimana. Hende merdimî do serdî de se bikerî? Herçiqas ke qedexe çin o, labelê reyna zî rijnenî. Her roje keyeyêk, banêk û vîrardişê ma destê ma ra yenî girewtiş.”