Sêvê, Pakîze û Fatma verîya serrekê Sîlopya de resyay pê, seba pawitişê şarê Sîlopîya xover day û amey qetilkerdiş. 3 cenîyanê azad 3 dayikanê zerrî bi dej ra pîya pey xo de omidê serkewtişî û bawerîye serbestî zî ternay.
Verîya serrekê nika qezaya Şirnex Silopî de qedexeyê ke 37 rojan dewam kerd destpa kerd. No qedexeyî de Dayîka Taybet, Sêvê, Pakîze, Fatma, Salihê Dengbêj, Mele Hesen Sanir ê 70 serrî û Mehmet Mete yê 10 serrî ra pîya 26 welatijê sivîl amey qetilkerdiş. 37 rojanê qedexe de bi hezaran lejker û polîsê dewleta Tirk bi tanq û topan hêrîşê 7 taxanê (mehle) sûkî kerdî. Jû serrî ra dima wexto ke mordem sûk weyneno (nîyadeno) dirbetê şarî hona akerde û germîye. La heto bîn ra zî rexmê pêrokîn hêrişan ronişteyê sûk teslîmê polîtîkayanê dewlet nêbî û wayîrê rûmeta xo vejyay.
No qedexeyî de 3 cenîyê xoverder bî sembola rayveberîyanê cewherî yê. Endama Meclîsa DBP Sêvê Demîr, Endama Kongreya Jinên Azad (KJA) Fatma Ûyar û Hemseroka Meclîsa Şar ê Sîlopîya Pakîze Nayir qedexeya 37 rojan de amey qetilkerdiş. Mavêna malbatanê 3 cenîyan de pirdeke (kopri) ronîya.
Ma televîzyon ra aşnawit
Odeyo ke dayîka Pakîze, Behiye Nayir ci de roniştena de 2 resîmê Pakîze ser dêsî de aliqnîyayo. Dayika Behiye ana ziwan ke Pakîze domanîya xo ra heta pîlîya xo wayîrîya malbata xo kerd û wina vana: “Pakîze 23 rojan zerreyê tanq û topan de mend. Wexto ke pirodayişî qedîyay û taxe ra vejyay rexmo ke bêçekî bî amey qetilkerdiş. Ma televîzyon ra aşnawit ke ameya qetilkerdiş.
10 aşman ra dima, wexto ke qedexeyê vejyayişê teberî wedarîya, malbatî encex o wext êşkîya şiro ser mezeleyê keynaya xo. Rexmê pêrokîn jan û dejan zey her dayikek dayika Behîye zî waştena vindernayişê gonî kena û vana zey pêrokîn şaranê dinya ma zî hinî hizûr, haştî, weşî, têdûştî wazenê.
‘Heqê xo helal bike’
Maya Fatma Ûyar Xeyîç Ûyar zî bi nê vatenan behsê telefona peynî yê bi keynaya xo kena: „Rojekê bereyîya şewî de min geyrîya. Bado ke ma tayî qisey kerdî tewr peynî de va, ‘Dayê ez a çîyekê to rê vaja.’ Min sifte fehm nîkerd. Wexto ke va, ‘Dayê heqê xo mi rê helal bike’ mi telefon girewt û heta sodir hesrî çimanê mi ra varîyay.”
Dayika Xeyîç aşkere kena ke a roj seatanê vera şanî de ayî pêhesnayo ke 3 cenî Silopîya de ameyê qetilkerdiş û va: “Cenazeyê înan Şirnex de pêhet de ameyî definkerdiş. Hefteyê ravêrdî de ma bi malbata Sêvê û Pakîze şî zîyaretê mezelê înan. Se serra bîn zî ez sax bimana zî ez keynaya xo xo vîra nêkena.”
Peynîyê her şerekî haştî yo
Maya Sêvê Demîr, Sakîne Demîr ke bi seyan kîlometreyan ra dûr Manîsa ra kewt ray seba zîyaretkerdişê mezelê keynaya xo şî Şirnex. Verîya ke şiro ser mezelê Sêvê, sifte malbatê Pakîze û Fatma zîyaret kerd. Dayîka Sakîne zî resîmê 3 cenîyan ser dêsî de aliqnayê.
Dayika Sakîne zî fikir û hîsanê xo bi nê vatenan ard ziwan: “Dewlet hîrê cenî xo rê kerd hedef û domanê ma qetil kerdî. Silopîya ra destpa kerdî û bi Cizîr, Şirnex, Nisêbîn dewam kerdî. Ma pawenê ke kiştoxê ke 3 cenîyan qetil kerdî bîrê cezakerdiş. Sûkanê ma de sî ser sî (kemer) de nêverday. Cenî, doman, genc, kalê 70 serrî qetil kerdî. Ma qey ma bi kiştişî qedîyenê. Çi beno wa bibo, peynîya no şerî haştî yo.
DÎHABER / ŞIRNEX