Ewro 4’ê Nîsan, roja dayikbiyayişê Rayverê Şarê Kurd Abdullah Ocalan’î ya. La na roj, zey roja dayikbiyayişê kurdan û pêrokîn şaran yena qebûlkerdiş. Kurdî verba tecrîdî, polîtîkayanê îmhayî, înkarî û qirkerdişî ra meydanan de yê û azadîya Rayverê xo qîr kenê.
Şarê kurd her serre 4’ê Nîsan, rojbiyîna Rayverê xo de meşîyenê Amara. Emserr zî bi hezaran reyde heme sûkan ra welatijan verê xo day Amara.
Bi taybetî serrgêra 67. yê roja dayikbîyayişê Rayberê Şarê Kurd Abdulah Ocalan’î zaf muhîm û bimbarek a. Her netewbîyayîşê şaran de yew Rayver, Pêxember û yew mesîh vejîya yo. Ewta de ravêreyîya netewbîyîşê kurdan nêbîyo û raştî raştî ra kurdî kewtî binê koletîye û bindest bîyê. No sebeb ra yo ke rol û mîsyonê Ocalan’î zaf muhîm o.
Kurdî sernawera ganî kerd
Wexto ke ma rewşa mîtolojî ra ewnênê heme pêxemberan mucîzeyî viraştî, merdimê merdeyî sernawera ganî kerdî. Ocalan’î zî bi raştayî ra raşte kurdî sernawera ganî kerd. Ewro zî kurdî weriştê ser lingan keseyateya xo, nasnameyê xo, kurdatiya xo, ziwan û kultirê xo şinasnayo û têkoşînê xo ra dewam keno. Ewro her çi qe Rayverê Şarê Kurd Ocalan bi demê dergî ra binê esaretî do zî, ancî (fina) zî heme ravêreyîya Kurdistan, Tirkîya û dinya dîyar keno. Ocalan’î heta ewro zî seba pêameyîşî û aştî bi sebirê Pêxember Davut’î ra hewldayenê xo domna. Bi saya hewldayen û sebirê Ocalan’î de Tirkîya reyna sifte serva çarekerdişê meseleya kurdî, resya merhaleyê muzakere. La çi heyfo ke hikûmeta AKP û Tayyîp Erdogan’î no nîyetê baş yê Ocalan’î suîstîmal kerd. Netîce de ewro zî her roj cenazeyî yenê û gonî rijyena.
Tirkiye vera qîyamet şina
Kişta nay de Erdogan’î verba qirkerdişê kurdan ra seferberî îlan kerdo. Tayyîp Erdogan her roj fermanê qetilkerdişê kurdan dano, tax, kuçe û keyeyanê kurdan rijneno û dest roneno ser. No sebeb ra yo ke Tirkîya, vera yew qîyametî ra şîyena. La çi heyfo ke zafî kesî na qîyametî ra çepikan danê û paştî danê qirkerdişî. Nê qetilkarî zî hewsarê xo qerfnayo estora xo hewayê harbîyîşî ra xar dano û kam verba ey bêro se heme kesî palincneno û vêreno. Erdogan vano gama ke ez şêro, wa heme kes min reyde bêrî. La winî aseno ke Tirkîya de pela nîjadperwerî bena berz, kulturê dejenerasyonî zereyê civakî de beno xorîn. Eke çend serranê peynî de cenaze nêameyî se, no saya Rayverê Şarê Kurd Ocalan’î ra yo.
Jû serriyo Ocalan’î ra xeber çinya
Ocalan 17 serriyo ke bin sîstemekê teybet û tecrîdeke giran de yeno tepiştiş. Serra 2012î ra na het zî nêşkeno bi pawitoxanê xo rey de pêdiyayin virazo. Herzewbîn jû serriyo, yanî 4ê Nîsan 2015î ra na het zî ne heyetî, ne malbat kesî nêşa şirê Îmrali. Jû serriyo Ocalan’î ra xeber nîna giroten. La no tecrît û esaretê taybet şexs dê Ocalan’î de vera pêrokîn şaran rameno. No sebeb ra yo ke roja 4’ê Nîsan, roja rojbîyîşê pêrokîn kurdan û şaran a.
Serra serkewtişî
Serva 4’ê Nîsan, vizêr ra pêrokîn sûkanê Vakûr û Tirkîya ra şar herikya vera Amara. Çike Amara cayê roşneyî ya û cayê pîrozîya. Nayî ra, 4’ê Nîsan de şar verba tecrîtî, îmhayî, înkar û qirkerdişî ra meşîyeno Amara. 4’ê Nîsan roja wayîrvejîyayîşî kedê şehîdan a. Wayîrvejîyayîşê rayvistişê xoverdayîşê îdareyê cewherî yo û îdareyê xoserîya demokratîk o. Nayî ra şar heme cayan de xoverodayîşê xo dano û Rayverê xora wayîr vejîyeno.
Kurdî bi xoverdayiş û tekoşînê xo anê zon ke, na serr, serra serkewtişî û azadiya Ocalan’î ya. Çike ray û tercîxe ke zewbîn yê kurdan nêmendo. Verba konseptê herbî yê AKP, encex seferberîya xoverdayişê topyekun bena cewab.
NAVENDÊ XEBERAN