Xoverdayîşê Hemsereka KCDyî Leyla Guven roja 92. de yo. Leylaye badê ke 25ê Çele de serbest ameye veradayîş keyeyê xo de çalakîya xo dewam kena.
Leyla Guvene êdî problemanê weşî cuyena û hetê şimitişî de zî zehmetî ancena. Tansîyonê berzî vera wexto ke wirzena payan ser zehmetî ancena. Embazê HDP, DBP, TJA û hemwelatîyî şonê keyeyê Leylaye û piştî danî aye. Her çiqas ke polîsî hêriş bikerî zî çalakîya piştîdayîşê Leylaye her roje dewam keno. Xeylê bajar û qezayanê cîya cîyayan ra zî seba piştîdayîşî yenî zîyaretê Leylaye. Wexto ke beno şewe hemwelatîyî şonê verê keyeyê Leylaye û piştî danî çalakîya aye. Seba piştîdayîşê Leylaye çar hetê dinya ra mesaj yenî.
Hunermende Akkaya şîye serdana Guvene
Perê zî hunermende Îlkay Akkaya şîye serdana Guvene. Akkaya seba Guvene deyîra “Kir Huznunu” vate.
Çalakîya Endamê Meclîsê HDPyî Nasir Yagizî ke Hewler bi eynî taleban dest pêkerdbî zî roja 78. de dewam kena. Çalakîya grevê vêşanîye ya Strasbaurgî û ya Îmam Şîş yê Gallerî zî roja 52. de yî. Çalakîya koma ewil ke 16ê Kanûne de zindanan de dest pêkerdbî zî roja 53. de dewam kena. Nika pêropîya zindanan de 281 ra zêde hepsîyê sîyasî grevê vêşanîye yê bêdem û anêgêrayîşî de yî.