Komîteya Zîndanî ya PKK û PJAKî derheqê serrgêra 36. ya 14ê Temmuze Rojeyê Mergî yê Girdî de îzehetêk daye. Komîteye dîyar kerde sey cuntaya 12ê Êlule, faşîzmê AKP û MHPyî zî hêrişê kurdan keno û wazeno ‘kokê kurdan biqelêno’ û wina domnayo: “Ganî ma zî bi ruhê xoverdakarîye têkoşînê xo bidomnî û wayîrê mîrasê înan bivejyî.”

14ê Temmuza 1982î de kadroyê rayberî yê PKKyî ra Kemal Pîr, M.Hayrî Durmuş, Alî Çîçek û Akîf Yilmaz zî tede xeylê kesî vera rejîmê derbeya leşkerî ya 12ê Êlule de Zîndanê Amedî de dest bi grevî kerdbî û emser serrgêra 36. ya çalakîya grevê vêşanîye yo.

Ser nameyê hepsîyanê PKK û PAJKî yê zîndanî, Komîteya Zîndanî ya PKK û PAJKî derheqê 14ê Temmuze Rojeyê Mergî ser o îzehetêk daye. Komîteya Zîndanî ya PKK û PAJKî dîyar kerde ke 36 serrî verê ame îlan kerdene ke PKK êdî bin nêkeweno.

Komîteye îzehetê xo de vato ‘14ê Temmuze roja ke neteweya kurdî rûmet qezenç kerdo yo û ma ewro sere de şehîdanê 14ê Temmuze û heme şehîdanê Şorişê Kurdistanî biminet yad kenî’ û wina dewam kerdo: “Ma sozê xo yê wayîrvejîyayîşê ananeyê têkoşînê înan dibare kenî. Rojeyê Mergî yê 14ê Temmuze vera wehşetê faşîzmê 12ê Êlule de serkewtişê îradeya merdiman nîşan dano.”

Hedefê 12ê Êlule de PKK estbi

Komîteye dewamê qiseykerdişê xo de daye zanayîş ke M.Hayrî Durmuş, Kemal Pîr, Akîf Yilmaz û Alî Çîçekî şertê tewr zehmetinan de serkewtiş senî yeno qezenç kerdene, nîşan dayî û wina vato: “Înan tarz, tempo û ziwanê Şorişê Kurdistanî dîyar kerdî. 14ê Temmuze de rejîmê 12ê Êlule û îradeya dagîrkere vera vindetişê Apogêrî de bin kewto. Çalakgêran tarzê serkewtişî dayo şarê kurdî û mîlîtananê PKKyî û bi no hawa rolêko tarîxî kay kerdî. Ganî ma xo vîra nêkerî ke cuntaya 12ê Êlule heme çîyî ra ver hedef kerdbî ke toximê PKKyî çinî bikero. Çimkî cuntaye fam kerdbî ke eke kurdî têkoşîn, bawerî û îradeya PKKyî qebul bikero, o wext do polîtîkayê 80 serrî yê ci veng bivejîyayêne.”

Roja ke roje dest pêkerd, serkewtişê ci tesilî bi

Komîteye va ‘bawerî, tarzê têkoşînî û îradeya ke 14ê Temmuze de ameyî nîşan dayene, tarzê Kurdistan de serkewtişî zelal kerdo û wina domnayo: “Roja ke Rojeyê Mergî yê Girdî dest pêkerdo, serkewtiş tesilî bîyo. Kemal Pîr yew îşkencekarî ra vato ‘Şima nêşênî mi ra of bidî vatiş, fekê mi ra vateyo ke şima bido rehet kerdene, do nêvejîyo. Ez do nê zewqî nêda şima. Ox azadîye çiqas weş a’. Reyna M.Hayrî Durmuşî wexto ke embazanê xo ra xatir wazeno, dîyar kerno ke wa kerraya mezelê ci ser o ‘Deyndarê şarê xo yo’ binusîyo. Dima ra Akîf Yilmaz înan taqîp kerd. Tewr peynî Alî Çîçek zî înan ra tepîya nêmend. Alî Çîçek zî ‘Partîya mi teslîmîyet nê, xoverdayîşî musnaye mi’ û 17ê Êlule de şehîd kewt.”

Ganî ma têkoşînê xo gird bikerî

Komîteye peynîya îzehetê xo de wina vato: “Senî ke rejîmê 12ê Êlule rayber, kadro û sempatîzananê PKKyî ra vatêne ‘şima ganî fek no fikir ra verabidî, ganî şima vera Rayber Apo û tevgerê azadîye de bivejyî’, ewro dîktatorîya AKP û MHPyî zî vano ‘ma do kokê înan biqelênî’ û hêrişê kurdan kenî. Ma veng danî heme kurd, dost û mîlîtananê azadîye ke heta ke şarê ma serkewtişî gêno binê temînatî, wa bi ruhê têkoşînî xoverdayîşê xo gird bikerî û wayîrê mîrasê şehîdan bivejyî.”

 

 ANF/BRUKSEL