Li Kobanê bi armanca şermezarkirina komkujiya Parîsê bi hezaran kes meşiyan. Girse li Meydana Azadî kobû. Girseya ku posterên Rêberê Gelê Kurd Abdulah Ocalan û wêneyên Sakîne û hevalên wê vekiribûn bê navber diruşme berz dikin. Meşvanên ku di destê xwe de alên Yekîtiya Star, YPG/YPJ, TEV-DEM û tevgera ciwanan vekiribûn heta ber navenda partiya Yekîtiya Demokratîk (PYD) meşiyan. Li vir li ser navê Yekîtiya Star, TEV-DEM, Tevgera Ciwanên Şoreşger, PDKE-S û Însyatîfa Jinên Sûriyê axaftin hatin kirin. Di axaftinan de komkujiya Parîsê hate şermezarkirin û tekoşerên kurd ên jin hatin bibîr anîn. Piştî axaftinan meşvanan dawî li çalakiya xwe anîn.

Li bajarê Dêrikê jî Tevgera Jinên Ciwan ên Şoreşger li navenda ciwanan a Şehîd Bawer belgefîlmek li ser jiyana 3 tekoşerên jin Sakîne, Fîdan û Leyla pêşkêş kirin. Fîlm bi tevlîbûna dehan jinên ciwan hate pêşkêşkirin. Piştî filmê Endama Kordînasyona Tevgera Jinên Ciwan Rûkan Xebat axivî û komkujiya bê bext a Parîsê şermezar kir. Rûken da zanîn ku komkujî li dijî îradeya jinana azad pêk hatiye.
Li Tirbespiyê jî Bi însyatîfa Jinên Ciwan ên Şoreşger û Yekîtiya Star bi hezaran kes bi armanca şermezarkirina komkujiya Parîşê meşiyan. Meş bi tevlîbûna hezaran welatiyê kurd, Suryanî û erebên ku ji Tirbespiyê, xeta Aliyan û Sinceqê ji ber navenda Ciwanên Şoreşger a Tirbespiyê destpê kir. Meşvanên ku alên YPJ/YPG, posterên Rêberê Gelê Kurd Abdulah Ocalan û wêneyên tekoşera Kurd Sakîne Cansiz û hevalên wê vekiribûn û bê navber diruşmeyên dilsoziya bi dilsoziya bi jinan re berz dikirin. Meşvan heta çerxeriya Azadî meşiyan û li vir dawî li meşa xwe anîn. Li vir mîting destpê kir. Mîting bi rêzgirtinê destpê kir. Piştre li ser navê sazî û rêxistinan axaftin hatin kirin. Piştî axafinan welatiyan bi diruşmeyan dawî li çalakiya xwe anîn.

NAVENDA NÛÇEYAN