Wexto ki kesî rîpelê rojnameyanê tirk akerdê, zafê xeberanê ci derheqê Qendîlî de bî. Pêrin qalê qehremanînê artêşa tirk kerdê. Pêrin lazimînê operasyonê vera Qendîlî nûsnayê. Îdîa kerdê ki, lejkerê tirkan 2-3 saetan miyan de ala tirk berê Qendîl de vilêncik bikirê.
Serokê fermandarînê artêşa tirk, ê wextê operasyonê Zapî Yaşar Buyukanit her roj vejiyaynê qisey kerdê. Medya tirk cayo hîra dayê Buyukanitî. Xora zey vatoxê lejê psîkolojîkî hereket kerdê. Hîmê operasyonî kerdê hedre. Verî operasyon dest bikiro ci, zeki “Dest kerdo ci û serkewtê” hereket kerdê. Vatenanê Buyukanitî ser, medya tirk hewayê zeki peyniyê PKK ameyo kerdê vila. Bi kilmî çiyê ki, nika şima medya AKP de vera Rojawan vînenê, o çax zî hema pêrinê medya tirk de vera Qendîlî ca girotê.
Artêşa tirk bi ê hewaya zeki şirê veyve, 22’ê sibata 2008 de, Zap ra dest bi operasyonê hera kerd. Emelê tifînganê gird û teknîkê berzî kerdê. Vatê qayê, iyê bi tifînganê gird û teknîkê berza ser bikewê. Hedefê sifteyin destvistinê Qerargeha Merkezî yê HPGî û bado zî qerargehê Hereketê Azadiyê Kurd ê Qendîlî bî. Wexto ki hewna newe operasyonî dest kerdbi ci, medya tirk mîjdana serkewtini kerdê vila!. Labelê rastîn winî nêbi. Heta rastîn tam tersê xeberanê medya tirk bi.
Hewa zaf sard bi. Binê sifir de 20 dereceyan bi. Hewayê hend sardî de, hetê gerîla ra xoverdayiş nêpawitê. Labelê gerîlayan, heme planê înan xeripinay. Vera bi hezaran lejkeran, tifînganê gird û teknîkê berzî, xoverdayişê tarîxî mûsna. Gerîla artêşa tirk û dewleta tirkî şoq kerd. Dewleta qandê îlankerdinê serkewtin û şahiyanê pîrozkerdin heme çî kerdbi hedre, darbeyan sero darbey werdê. Her saeta ki ravêrdê, vengê Yaşar Buyukanitî biyê kemî.
Gerîlayan çend rojan miyan de, artêşa tirk pêrîşan kerd. Îtîbarê ci girot binê lingan. Fermandar û rayverê dewleta tirk vera xoverdayişê tarîxî yê gerîla bî lalî. Şerman ra nêşayê vejiyê tever. Gerîlayan rojê 7 ê operasyonî, yanê 29’ê şibat de, heme lejkerê tirk Zap ra qewirnay. Performansê lejkerîn yê kurd mûsina dinyay. Fina bîn mûsna ki, binvistinê Hereketê Azadî yê Kurd mumkun niyo.
Vatenê rayveranê AKP û dewleta tirk, xeber û nûşteyanê medya AKP ra oyo winî ayseno binkewtinê Zap ra ders nêgirota. Çiyê o çax vera Mintiqanê Pawitin ê Medya rê kerdê, nika vera Rojawan kenê. O çax xîntin kerd û verpersê heq kerdbi girot. Helbet nika zî, eki ancî xîntin bikirê, na fin, iyê meşê zey wextê Zap, bireme û bixelisiyê.
Memed DREWŞ