Federasyonê Elewîyê Demokratîke (FEDA) derheqê veşnayîşê dewleta tirkî yê daristananê Dêrsimî û hêrişê dewleta tirkî yê Şengalî de îzehetêko nuştekî da. FEDAye dîyar kerde ke Dêrsim yewna rey hetê zulmê neheqî ra ameyo veşnayene û wina domnaye: “Çîyo ke ameyo veşnayene vîrê ma yo ke bi seserran o yeno çînîkerde yo.”
FEDAye dewamê qiseykerdişê xo de wina va: “Zîhnîyeto ke Dêrsim dayo adirî ver, bi tanq top û teyarayanê mîlyon dolaran hêrişê mekanê pîrozî yê êzidîyan Şengalî keno. Toximê kîn û qetlîyamî ke Kerbela de erzîya, roja ma ya ewroyî de şexsê AKPyî de vejîyeno raste. Seke qetlîyamê çeteyanê DAIŞî ke hetê AKPyî ra yenî destek kerdene bes nêbo, nika zî merdimê bêpawitişan ser o bombeyan varnenî.”
FEDAye daya zanayene ke ganî ê şewatê Dêrsimî û bombeyê ke Şengal ser o yenî varnayene bivindarnî û wina dewam kerde: “No wezîfeyê ma hemînan o. Eke ewro nêbo, ma do key nê zulmî ra vajî ‘Bivindere’. Harde Derwêş veşeno, Muzir Baba, Ana Fatma û Laleş sere wedarnayî. Ewro cografyaya Xizirî veşena û yena bombe kerdene. Ma veng danî şarî ke wa wayîrê Dêrsim û Şengalî bivejyî. Sey FEDA ma vanî wa herkes wayîrê nê cayanê pîrozan bivejîyo. Wayîrvejîyayîşê Dêrsim û Şengalî mîyanê îkrar û îbadetê ma de yo. Ewro roje vera zîhnîyetê Kerbela de bîyayîşê Zeynepe, vera zîhnîyetê Yezîdî de bîyayîşê Huseyîn, Êzidxan de Cîhangîr, Şengal de Mam Zekî bîyayîş o. Roje roja vera zulmî de vindetişî ya.”
ANF / BRUKSEL