Ramîn Hisên Penahî peyêna peyêne de ame darde kerdene. Bêgûman her çend rojan de reyêk dewleta Îranî ya faşîste kurd bo kurd mebo, çi cinî ba çi camêrd bo darde kena. Ganî ma vera heme dardekerdişan de vinderê. Dardekerdişê Ramîn Hisên Penahîyî bi malê tora komelî. Ma heme nê dardekerdişî ver dejayî. Tayênan medyaya komelkî de nuştêne û vatêne: ˝Eke dewleta ma kurdan estbîyêne wina nêbîyêne.˝ No tespît zaf şaş o. Çunke Îran de farisî estê û wayîrê dewlete yê. Hetê na dewlete ra zî yenê darde kerdene. Yanî şarêk bibo wayîrê dewlete dardekerdişî dest nêreyeno. Tîya de çare çîyêko bîn o. Fina Başûrê Kurdîstanî de statûyek nêm dewlete esto, la nînan dewleta Sûrîye ra vêşêr dişmentîya Şorişê Rojawanî kerdêne û kenê. Ganî hol bêro fam kerdene ke bi destvistişê dewlete komel azade nêbeno. Azadîye çîyêka teberê dewlete de yena cuyayene. Qandê cû Rayber Ocalanî fek dewlete ra vera da. Labelê na babete hîna zî rind nêameya fam kerdene. Çi heyf!
l Dewleta Îranî gale berd di partiyanê Rojhelatê Kurdistanî ke Başûrê Kurdîstanî Koyê de manenê. Eke merdim tarîx ra biewnîyo baş fam keno ke PDK û YNK nê 40 serrî yo peyên de bîyê wayîrê pratîkê xayînane. PDK rêxistine, partî, serek û kadroyanê partî û rêxistinan çinî kena. Wexto ke wina kena hetkarîya girde zî dewletanê dagîrkeran ra gêna. Yanî PDK sey ofîsê dewletanê dagîrkeran girweyena. YNK zî hema winî ya. Nê her di partîyî sucdar ê. Nînan hem partîyanê Bakurê Kurdîstanî hem zî Partîyanê Rojhelatê Kurdîstanî çinî kerdê. Çinîkerdişê Partîyanê Rojhelatê Kurdîstanî de rolê PDK esto la rolê esasî YNKyî girewto xo ser û karê xo zî baş kerdo. Xora peynîya nê kerdenanê YNKyî de Partîyê Rojhelatê Kurdîstanî serkewte nêbîyê û bîyê mahkumê YNK û Koyê de ameyê bica kerdene. Nê partîyan ser o kontrolê YNK se ra se yo. Seba ke YNK jî kontrolê Îranî de yo kontrolê Îranî jî nê partîyan ser o se ra se yo. Nê partîyî bîyê marjînal. Êdî çîyêko bikerê zî nêmendo. Rewşe wina ya la na rewşa winasî de çirê Îran gale berd nê partîyan ser. Ganî têgêrayîşêko baş bêro kerdene. Nê partîyan de kesê welatperwerî zaf ê. Wazenê têkoşîn bikerê la seba ke zîhnîyet û bernameyê partîyan de xo nêvurnenê nêşenê çîyêko ciddî bikerê. Werekna wina nêbîyêne. Ez hêrişê Îranî de kesê ke bîyê şehîd bi rêzdarîye ana xo vîr. Dirbetinan rê weşîye wazena.
l Nê rojan de ez Qamişlo de ya. 8ê êlule de hêzanê Sûrîye cayê xo ra vejîyayî û verê xo dayêne cayanê ke kontrolê asayîşê kurdan de yo. Peynîye de pêrodayîş ame kerdene. Ma nê serebûtanê peyênan yê her çar leteyanê Kurdîstanî de vînenê ke nê dewletê gewende xo bi xo xo nêvurnenê û heqanê kurdan nêşinasnenê. Nê dewletî ganî yan hetê şarê nê dewletan ra bêrê vurnayîş yan zî ganî Tevgerê Apoyijan nê dewletan bivurno. Vurnayîş zî bi metodanê diplomatîk û sîyasîyan nêbeno. Ganî mudaxaleyêko huşk bêro kerdene. O zî ser vistişê şorişî yo. Nêke nê dewletî tim do biwazê kurdan xo rê bikerê kole. Çunke hişê dewletanê dagîrkeran de kurd tena eşkeno bibo kole. Qandê cû seba ma kurdan û şarê ke ameyê kole kerdene, tena rayîr şoriş o.