AKP hata na roze poşt dana DAÎŞ. Ver ra na het AKP bi pêro îmkananê dewleta xo lewê DAÎŞ de ca guret. DAÎŞ ra avê kî AKP El Nusra rê yardim kerdenê. Seweta qetilkerdena kurdan hukumatê AKP destebera xo çi ke ame kerd. Na rîwal ra demê muzakere kî jû zurê AKP yo. Na zur nî rozan de hebena bî zelal.

- Nî roz û asmanê peyenan de se bî?
- Musul teslîm guretene ra tepiya rêxistina îslamî ya terorîste verê xo çarna kurdan, Şengal de kurdî qetil kerdî. AKP vengê xo nêvet.
- Waxtoke rêxistina îslami ya terorîste DAÎŞ Şengal ra bi hezaran çene û ceniyê kurdî remnayî berdî, ci rê tecavuz kerd, mezatan de rotî, AKP vengê xo nêvet.
- Waxtoke şarê ma wo ezîdî rîwalê zulmê DAÎŞ ra, Şengal ra ame bakurê Kurdîstanî, hukumatê AKP bi taybetiye yemê Roboskî de şîndorî guretî û şarê ezîdî rê zulm kerd, nêwast şarê ma bêro Bakur.
- Hukumatê AKP ezîdiyan rê yardim nêkerd û nêkena.  
- Waxtoke DAÎŞ hata Mexmur ame, verê xo çarna Hewlêr û Barzanî hukumatê AKP ra yardim wast, AKP qeyta xo nêlewna. Barzanî berva, hama onca kî AKP ra dûrî nêkewt. Hata tirkperestî Neçîrvan Barzanî vat, Tirkiya DAÎŞ rê yardim nêkena. Rixmê honde zulmê AKP yê verva kurdan, Rudaw bî şaxa televîzyonê TRT yê AKP.
- Waxtoke DAÎŞ sarê kurdan ci ra kena, AKP ra veng nêvejîno.
- Unîversîtanê Tirkiye de azayê rêxistina îslamî ya DAÎŞ erzenê wendekaranê demokrat û welatparêzan ser, polîsê AKP azayanê DAÎŞ rê yardim kenê.
- Bi seyan azayê DAÎŞ Estemol de yenê pêser, hukumatê AKP jû polîsî bîle nêrusneno lewê nî qetilkaran.
- Şîndorê mavênê Pîrsus û Kobanê de arteşa tirkî azayanê çeteyanê DAÎŞ rê eskera her yardim kena.
- Hukumatê AKP pêro çeverê şîndorî û nêwesxaneyî azayê DAÎŞ rê kerdê ra.
- Lewê naye de kobaniz yê ke pêrodayîsan de biyê dirvetin û wazenê şîndo ra ravêrê bêrê Bakur de tedavî bibe, AKP înan nêverdana zerre.
- Na rîwal ra xeyle kobanizan weşiya xo verê çimanê homete de kerde vîndî.
- Hetê Kobanê de paralelê AKP DAÎŞ, yemê Pîrsûs de AKP bi xo jû asma ke verva kurdan piya danê pêro.
- Hefto peyen kî AKP û paralelanê xo Bakur de teror vayda û bi desan welatparêzî qetil kerdî.
- Jû roze de “Tirkiya newiye” biye Tirkiya kane. Orfî îdare ame îlan kerdene, AKP azayê Hîzbulkontra û rêxistina DAÎŞ seweta qetilkerdena kurdan ardî kar.
- Polîsê AKP slogan erzenê vanê “biciwiyo DAÎŞ”
- Valiyê AKP vano “kes bi qersuna polîsî nêkişiya...” No vatîs keno eskera ke AKP azayê çeteyan jê Hîzbulkontra û çeteya DAÎŞ sone kerdê, Bakur de verdê ra kurdan ser.
Hukumatoke vano “PKK û DAÎŞ jûyê” ci ra haştiye gune meyero pîtene. Û hen omid ken ke Kobanê waronêginena, Erdogan gineno waro.