Teşebusê derbeyê 15ê Temmuze ra dima OHAL ame îlankerdiş û KHK yê ke ameyî weşanayîş 178 sazgehê çapamenî ameyî padayîş û 30 cênî bi temamî 159 rojnamegerî ameyî tepiştiş. Nayî het de KHK yewin ajansê xeberan yê cênîyê ê dinya JINHA zî pada. Bernameyê Mor Bultenê ÎMC û Ekmek û Gul ê Hayatin Sesî TV zî ame padayîş.
‘Ma sereyê xo nêdanê ro’
Muxabire Dîhaberî Dîren Yurtsevere vatişê serekkomar sey ‘tena di rojnamegerî tewqîfkerdeyê’ ard vîr û va nika 159 meslekkerdoxê ma tewqîfkerdeyê û wina va: “Welatêke bi KHK bêro îdarekerdiş, merdim nêeşkeno qalê edalet, azadî, têduştî û aştî bikero.
Yurtsever vist vîrî ke hêrişê hemverê çapemenî tarîxî yê û wina va: “Ma zanê sazgehê bombarduman kerdê. Rojnamegerê ke ameyê qetîlkerdiş estê. Bi OHALî zî waştî ke normal bikerê. Çapemenîya azad ke qetî sere nêdayî ro û tîya ra tepya zî do sereyê xo nêdê ro. Ma do her wext rayîrê xo dewam bikerê.”
‘Rojnamegerî sûc nîyo’
Rojnameyê Bîrgunî ra Burcu Cansu zî ard ziwan ke tedayê hemverê çapemenîya azade dimayê 15ê Temmuze hîna zêde bîyo û bi îlankerdişê OHALî ra 20 Temmuze 2016 de zî rojnamegeran rê ‘hepisxane, qedexe, betalî’ ame. Her roje heqê şarî girewtişê xeberan yeno astengkerdiş. Rojnamegerî hedef mojnayî ra. Tirkîya de çîyê ke ameyî cuyayîş hetê çapemenîya azad de şerm o. Rojnamegerî ziwan û wijdanê şarî yê. Ma do bi vengêke berz vatişê xo dewam bikerê. Rojnamegerî suc nîyo û ma rojnamegerî dimayê heqîqetî bê.”
Viraştişê xeberê rastî wezîfeyo
Muxabira Ekmek û Gul, Burcu Yildirime zî wina va: “Tirkîya de xêrcê serekkomar Tayîp Erdogan û îqtîdarê ey û hetkarê ey heme cuya hepsî cuyenê. Tena semedê medyaya komelkî merdimî ameyî tepiştiş.Rojnamegerê ke hetgir nîyê hedef ameyî mojnayîş. La ma do her wext xeberê rastî viraznê û no zî wezîfeyê ma yo.”
ŞÛJIN/ANQARA