Kampanyaya nê her ke şono resena hetanê cîya-cîyayan û nê hetî derheqê referandûmî de seba çi do vajî nê, aşkere kenî.Nê hetan ra yewe zî romanê ke Edene de taxa Şakîrpaşa de cuyenî yî.
Romanî îqtîdarê 15 serran yê AKPyî de rewşa înan bi ti hawayî nêbedilîyaya; tim zext, betalî û tedayan reyde rî bi rî mendî. Romanan derheqê referandûmî de qisey kerdî û fikrê xo aşkere kerdî.Romanan ra Ahmet Kansuyî va ‘ez nêweş a û muhtacê miqatekerdişî ya’ û wina domna: “Mi heta nika ti hetkarîye îqtîdarê AKPyî ra nêdîyo. Ma dezavantajê romanbîyayîşî wextê AKPyî de her hetî ra cuyayî. Nêyî ra dima ma do dîktatorîya kesêk ra nêvajî ya.”
Ma do vajî 'Nê'
Rabîa Akaye zî qisey kerde û wina va: “Dewlete û adaletêko winasî nêbeno; betalî esta, ma vêşan î, sîgortaya ma û ti temînatê weşîya ma çin o. Milet merda û keyeyê xo de leteyêk nane nêvînena. Wa lanet bêro dewlete rê. Ma do vera nê bêedaletîye de bi tesilî vajî nê.”Ayhan Akayo ke bi rotişê maseyan debara xo keno zî wina vano: “Vistirîya mi ya nêweşe zî hetê ma de ya û îmkanê ma çin î ke ma aye tedawî bikerî. Ma heta şan de karê maseyî kenî û kar nêbeno. Ma do vajî nê û xora sewbîna weçînite vernîya ma de çin a.” Yildiz Sagliye zî va verê cû ma referandûmî fam nêkerdêne, labelê dima ra wexto ke ma fam kerd ke ma do hetê kesêk ra bêrî îdarekerdiş, o wext ma qerar da ke ma do vajî nê.
Ti kes nêvano 'Ya'
Medenî Akça zî hîna newe hepis ra vejîyayo û betal o. Akça domano ke verika ey de yo nîşan dano û wina domneno: “Ez nêşêna domanê xo ra biewnîya û rewşêka zore de ya. Her çiqas ke ma hewl bidî derdê xo vajî zî, ti kes goşdarîya ma nêkeno. Wexto ke ma ziqaqan de gêrenî, tena çend kesî halê xo ra memnun î. Ê zî ranto ke îqtîdarî ra gênî ver memnun î. Ma do vajî nê.”Pîlan ra dima domanî qisey kenî û domanî seba ameyoxêka başe vanî ‘Nê, Nê, Nê’.
SEDAT SUR / ANF / EDENE