ZAHÊR ÎBRAHÎM / ROJNEWS / SILÊMANÎ
Akademîsyen û rojnamegeran vera dagîrkerîye de bêvengîya Îraq û Hukmatê Başûrê Kurdîstanî rexne kerd û vera dagîrkerîye de seba xoverdayîşî veng da.
Rojnameger Mihemed Çavşînî va ‘dewleta tirkî PKK kena mehne û sîvîlan bombe kena’ û wina domna: “Hêrişî zirarêko gird danî ekonomî û tebîetî. Herême de welatîyî yenî koçkerdene. Hetêk ra hukmatê Îraqî û Başûrê Kurdîstanî û hetêk ra zî komelê mîyannneteweyî bêveng manenî.”
Akademîsyen Mexdîd Haciyî va ‘ganî hukmatê Başûrê Kurdîstanî û Îraqî peynîya bêvengîye bîyarî’ û wina dewam kerd: “Badê ke Wezîrê Karê Teberî yê Tirkan Mewlut Çavuşoglu ame Hewlêr û şi hêrişê dagîrkerî zêde bîyî. Îdareyê Îraqî vera dagîrkerî û qetlîyaman de bêveng maneno.”
Ganî şar mîyanê çalakîyan de bibo
Akademîsyen Loqman Şîlanîyî zî wina va: “Îraq û Hukmatê Başûrê Kurdîstanî nêşkenî şarê xo bipawî. Zêdebîyayîşê hêrişê dewleta tirkî û qetilkerdişê ciyê sîvîlan zehîfîya Hukmatê Başûrî û Îraqî nîşan dano. Çi heyf ke qetlîyamê Kortekî ra dima reaksîyonêko cîddî nêvejîya. Ganî welatîyî bêveng nêmanî. Ganî sere de şarê Bradost, Qendîl û Balekayetî û xeylê cayanê bînan de şar vera dagîrkerîye de mîyanê çalakîye de bibo.”