Kitabanê kirdkî ra “Meymanê Homayî“ yê Mihanî Licokicî yo, 48 rîpelî yo û tede 99 hebî fiqrayî estê. Warê mîzahî de kitabêko balkêş o; bitaybetî seba merdimanê ke newe musenê wendiş û nuştişê kirdkî, eserêko îdeal o.
“Sanikanê Mamekîye ra”
Kitabê diyin yê kirdkî “Sanikanê Mamekîye ra“ yê Nadîre Guntaş Aldatmaze yo. Kitab verê cû 2013 de hetê Unîversîteya Artuklu ra çap bibi û 116 rîpelî bi. La dima nuştoxe new sanikî û hîrê meselayî îlawe kerdê û kitab sey çapa diyina hîrakerdîye Weşanxaneyê Roşna ra weşanîyayo. Çapa diyine 168 rîpelî yo.
Kitabê hîrêyin o bi tirkî “Toplumsal Kürt Gruplarından Zazalar“ 168 rîpelî yo, tede des meqaleyî û hîrê roportajî estê.
Grûba komelkî
Nuştoxê kitabî Roşan Lezgîn vateyo verên yê kitabî de dano zanayîş ke ey nê meqaleyî mabeynê serranê 2009-2015 de çarçewaya munaqeşeyanê derheqê grûba komelkî ya kurdan zazayan de nuştê û roportajê ke dayê kitab de ca gênê. Û vano: „Ez hetê kok, mîlîyet, cografya, dîn, ziwan û edebîyatî ra derheqê na grûbe de panoramayêka pêroyî pêşkêş kena.“
Ancî wina îlawe keno: „Nê nuşte û meqaleyan de mi bale anta gelêk xebatanê ke verê cû derheqê na grûbe de bîyê ser labelê mi nêwaşt ez ê melumatan neqil bikerî. Çimkî heta ke mumkin o, mi xwu hemet kerd ke ez kitabî nêkerî qalind. Hîna zaf melumatê ke newe arêdîyayê û ancî zanayîş, data û averşîyayîşê ke mi bi hawayêko orîjînal tespêt kerdê, ez nê kitabî de pêşkêş kena.“ Seba kesanê ke wazenê derheqê kirdan (kirmancan, zazayan, dimilîyan) de bibê wayîrê melumatî no kitab beno çimeyêkê verên yê muracatî.
WEŞANXANEYÊ ROŞNA