Gorê vilavokê heqanê mordemî her kes reng, netew, kokê ci yê cematkî, cîns, zon, îtîqat, fîkrê xo yê siyasî û bînî, milkê ci, dîna rê amayena ci ya kî sebebanê bînan, çi beno bibo, têdust ê, pêro heqan û serbestiyan ra şîkînê feyda bikerê. Tirkiya ke îmza esta binê nayê, nika nînan ra kamcîne vîneme? Ya kî werte homete de ma kî niyada raşt nî pêro yenê hurende ardene? Ewro hîn ke herîşî estê ke her hetî ra ramenê. Hama jû qese esto vanê; zilmê xo jede bibo, hîn bibo ke, peyniya xo bi xo biyaro. Zilmê xo jede bibo ke hîn lezîna ke cayê xo ra bero war. Ma kî tarîxê dîna de niyade vîneme ke pêro kesê ke şaranê xo ser de zorvajiye kerdî, en peyniye de bi xo kerdê vîndî. Serva vîndî kerdena înan kî lazim o ke tekoşîne berê dayene. Xora tarêxê jû homete ke bi tekoşîna ci ya yena nûsnayene. Pêro qehremanî ke demê nî xoverdayişan de vejiye werte. Bedelanê girsan dayene ra peyser nêmende. Iyê ke ewro canê xo ya na şiyayis rê benê raye, qehramaniya en pîlî misnenê.
Qawxaya ke di serranê peyenan ramena, xeylê herîşanê pîlan rê ke sahîdene kerd. Her gucikê welat de jû sanike esta. Domanê ke may û piyê xo kerdê vîndî. Ya kî maye ke çeney û lazê xo kerdê vîndî. Iyê ke çeyê xo ame riznayene, werte na zimiston de xeman de, cayanê xirave de weşiya xo ramenê, raşt ke jû qese çîn o ke qehremaniya înan, sarreberziya înan biyaro zon. Bi hezaran çeyî ewro bi poşt vejiyayena qomê xo ya payra yî. Nayê ra tepiya ke xo vîrra mekerême înan. Teyna Şirnex biyarême çimanê xo ver. Sûke de sarrêberze ardê ci hal. Serva vurnayena demografiya herême pêro kayî sûke ser de kaykerdî. Eke ewro çixaş kî destê kam ra çik ame serva nî sûkan virast, o waxt jedena dawa xo rê ke dawa weşiya de serbest rê wayir ke vejîme.
E ke her gucik ra verra herîşan jû veng bivejiyo, faşîzme ke honde rew yena pisiqnayene. Her bedelo ke yeno dayene, têkoşîn û gurenayisê şoreşgerî ewro benê toxûmê ameyena serbest. Toxûmo ke nî rozanê giranan de bi zerrê weşiya erjîno hard, eynî demî de heyfê pêro dezan o. Nî rozan de verra pêro dormeyî ke faşîzme ra qeyir jû raya bîne, serbestiya şaran wazenî înan ser de serestisî, neheqî, pêguretene, kistene her ke şî jede benê. Nî rozan de namê dewlete teyna biya qûweta hêrişî, qûweta kistene. Endî kes besenêkeno vajero tivariya mi esta. Her cawo ke zilm û zorvajiye esta, ê cayan de namê weşiya ke tewa nêmanena. Eke raya xo ver estene xo rê çinene we, o waxt besekenê xeyalê rozanê têdûst, haştiye û xeleşiyayişî bikerême.
Iyê ke wastîsanê şarê ra tersenê, roze bi roze kenê vîndî. Pêro nî planê ke çarçewe ci de nî herîşî ramenê, puç vejîne. Iyê ke qûwetê tarî ra cenê en peyniye de binê roşte de xo kenê vîndî. Kistene, talan, xesp ra tewa nêvezene. Iyê ke tarî bi xo yê se kenê wa bikerê en peyniye de kenê vîndî. Lazim o ma jûbîn xo vîr ra mekerîme. Wayisê jûbîn ra qûwetê bicerême. Destê kam ra çik yeno en jede kî cayê ke bi xoverdayişî xoseriya ameyîbi riznayene, welatizanê ucayan rê wayir vejiyayene xo vîr ra mekerîme. Roşta serê sodir nejdi ya, tariyê înan vila kena.