Dozgerînê Amed badê çend aşman serva teşhîs kerdişê cenaze veng da malbatî. Badê teşhîs kerdişî cenaze, tabûta Rozerîn Morgê Nêweşxaneyê Gazî Yaşargîl ra bi çinayê veyvîn amê giroten.
‘Heqê mi to rê helal bo’
Wexto ke cenaze nêweşxane ra amê girotiş maya Rozerîn Fahrîye Çûkûr bi lorikan behsê keynaya xo kerd û dejê zerrîya xo resna heta asîmanan. May Fahrîye vist vîrî ke keynaya ay şehîda Kurdistanî ya û va, ‘heqê mi to rê helal o keynaya mi’, şehît nêmirenê! Cenaze malbatanê şehîdan, alwozanê Rozerîn ra pîya hetê seyan kesan amê giroten û bi konvoyeke derg berdîya dewa Pîran Herîdan. Cenazeya Rozerîn hetê seyan kesan ser doşê cenîyan de berdîya mezelxane û mezelo ke verîya panc aşman kinitîya de defin bî. May Fahrîye ke mezelê keynaya xo virarden kerd û fîdeyî ronay.
Hemseroka MEYADER Ayşe Dîcle merasîm de qisey kerd û aşkere kerd ke Rozerîn badê 5 aşman resya warê xo. Dîcle da zonayen ke dewlet qaîdeyanê herbî binling kena.
‘Malbatî çokanê xo nimiz nêkenê’
Wekîla Koma HDP Çaglar Demîrel zî da zonayen ke Rozerîn bi qelem û defterê xo tewrê xoverdayişê Sûr bî û nameyê xo bi herfanê altûn tarîxî de nusna. Demîrel vist vîrî ke hemverê xoverdayişê xorayirberdişan de hikûmeta AKP ke herbê qilêrîn ramena meşrûyetê xo vindî kerd.
Pîyê Rozerîn Mûstafa Çûkûr ke rîwalê girotişê cenazeyan bi aşman tekoşîn kerd zî va: “Dewlet her çî zana la çiyekê xo vîra kerd. Çiyo ke dewlet kerd xo vîrî ‘nimiz nêkerdişê çokanê xo yê malbatan o’. Pî Mûstafa’yî aşkere kerd ke Rozerîn serranê 90î de şahîdîya bombevornayenê dewan kerd û o wextî ra bi waştena azadî bî pîl. Mûstafa Çûkûr’î va, ‘domanê ma serva ke bêrûmetî qebûl nêkerdî û qabê xoverdayiş şî Sûr’ û rîwalê wayîrnêvejyayişê xoverdayişê domanan hometî rexne kerd. Çûkûr’î hayr ant nê girewtişê cenazeyanê Ramazan Ogut û Hakan Arslan’î ser û va ma dê nengûyê şehîdanê xo zî erdî de nêveradê û wayrê şehîdanê xo bivejyê. Ajanda û makîneya fotografî yê Rozerîn nay mezeleyê ci ser. Badê merasîm welatijî şî keyeyê serweşî ke Herîdan de ronîya.
DÎHA/AMED