Fermandaranê herêma Bradostî ra Sînor Rojhilate derheqê serrgêra 15ê Tebaxe de qisey kerde û wina va: “Hîs û bawerîya cinîyan yê 15ê Tebaxe ruhê pîyacuyayîşî xelq kerdo.  Ma do vera polîtîkayanê îmha û çinîkerdişî de estena xo bipawî. Ma gerîlayê HPG û YJA Starî nê ruhê 15ê Tebaxe Xakurkê de cuyenî û ma do bidî cuyayene.”

SARA XWÎNDA / ROJEN FIRAT / ANF / BEHDÎNAN

15ê Tebaxa 1984î de vera qereqolê fîzîkî û yê ke mezgê kurdan de ameybî awan kerdene de çalakîya sifteyîne ameybî kerdene û derbêka girde dîyaybî qereqolanê dagîrkeran ro. Emser serrgêra 34. ya Hemleya 15ê Tebaxe ya.

Fermandaranê herêma Bradostî ra Sînor Rojhilate serrgêra 34. ya Hemleya 15ê Tebaxe ser o qisey kerde. Fermandare Rojhilate dîyar kerde ke xoverdayîşî tarîx ra nata bêmabên ameyî û bi 15ê Tebaxe şekil girewtî û wina domnaye: “15ê Tebaxe cinî û ciwananê kurdan rê mîras o. Bi nê mîrasî têkoşînê xelqkerdişê demokrasî, azadî û cuya bi mana aver şîyî. Xoverdayîşê zîndanî yê Embaz Mazlumî tewr baş nê têkoşînî nîşan dano.  Kurdan bi 15ê Tebaxe estena xo şinasna. Bi nê kulturî bîyî wayîrê ziwan, nasname û kulturê xo. Dişmen qet nêyî hezm nêkerd û hertim waşt nê xoverdayîşî çinî bikero.”

Bi ruhê serra 1984î şer kenî

Fermandare Rojhilate va ‘ruhê têkoşînî yê 15ê Tebaxe ewro Başûrê Kurdîstanî de dewam keno’ û wina dewam kerde: “Ma hertim nê ruhî cuyayî. Hukmatê AKPyî yê faşîstî wazena erdê Başûrê Kurdîstanî dagîr bikera û qezencanê kurdan çinî bikera. Hêzê HPG û YJA Starî vera teknîkê averşîyaye û hêzê dewleta tirkî de heta nika qet tepîya game nêeştî. Ma gerîlayê HPG û YJA Starî nê ruhê 15ê Tebaxe Xakurkê de cuyenî û ma do bidî cuyayene. Têkoşînê ma hertim dewam kerd û vera heme hêrişan de do dewam bikero zî. Ma hêzê HPG û YJA Starî bi ruhê 1984î şer kenî, estena xo pawenî û têkoşînê nêyî danî.”

Heme cinîyan rê mîras o

Rojhilate peynîya qiseykerdişê xo de wina va: “Ma serra 2018î de zî bi ruhê Fermandare Bêrîtane, bi manîfestoya rizgarîya azadîye ya Zîlane, bi ruhê azadîye yê şehîde Nuda, bi ruhê Vîyane ke vera tasfîyekarîye de vindete, ruhê têkoşînî yê 1984î cuyenî. Ma do nê ruhî hîn bimana bikerî. Ma do abluqaya ke Îmrali û dormeyê cinîyan de esta, bişiknî û estena xo hîna bimana bikerî. 15ê Tebaxe ewro bi ruhê wayîrvejîyayîşê nasname, netewe û awankerdişê yewîya xo dewam keno. Ancax gandaro ke azadîye ra hes keno û kedkar o, eşkeno bi nê ruhî bicuyo. Kurd zî şarêko wina yo. Şarê kurdî estene, erd û xo rê rêz gêno. Ma hêzê YJA Starî xo no het de hîna berpirsîyar vînenî û no het de hewl danî bimana bikerî. Wa hêzê ma bibo unîversal. Hêzê ma do heme cinîyanê kurdan bianco gêrayîşê azadîye. Wa heme cinîyê kurdî mîrasê xo yê tarîxî rê wayîr bivejyî û wa hêzê xo bikirêşî roja ma ya ewroyî.”