Hemserekê Konseyê KCKyî Cemîl Bayikî serrgêra Hemleya 15ê Tebaxe ser o qisey kerd. Bayikî Hemleya 15ê Tebaxe pîroz kerd û wina va: “15ê Tebaxe ruhê demokrasî û azadîye yo. Eke ma berpirsîyarîya xo bikerî û xo bi felsefeya Rayber Apoyî rêxistine bikerî, o wext ma eşkenî serbikewî.”
Hemserekê Konseyê Koma Komelê Kurdistanî (KCK) Cemîl Bayikî derheqê serrgêra 34. ya Hemleya 15ê Tebaxe de qisey kerd û melumatê muhîmî pare kerdî. Bayikî qiseykerdişê xo de bale ant mana û muhîmîya Hemleya 15ê Tebaxe ser.
Hemserekê Konseyê KCKyî Bayikî va ‘hemleya 15ê Tebaxe zerrîya Kurdistanî Botan de dest pêkerde’ û wina domna: “Hemle Botan ra veng daye şarî. No vengdayîş cewabê xo dî. Tena kurdî nê, şaranê bînan ra zî yê ke beşdar bîyî, estbî. Na hemle çar parçeyê Kurdistanî û Rojhelato Mîyanên ser o tesîrêko gird viraşt. Ruhê 15ê Tebaxe hertim ganî yo. 15ê Tebaxe ruhê azadî û demokrasîye yo.”
Bayikî qiseykerdişê xo de Hemleya 15ê Tebaxe pîroz kerd û wina va: “Ez sere de rayberê 15ê Tebaxe Egîd û heme qehremanan bi rêzdarî vîr ana. Hemleya 15ê Tebaxe vera faşîzmê 12ê Êlule de ameye viraştene. 12ê Êlule de waştî kurdan bipelçiqnî û Kurdistan açarnaybî zîndanî. Rayber Apoyî nîşan da ke ê nêşênî kurdan bipelçiqnî. 15ê Tebaxe têkoşînê azadîye yê kurdan o. Dewleta tirkî vatêne ‘nê 2-3 eşqîya yî, ma do heta çend rojan biqedênî’. Ti kesî bawer nêkerdêne ke do hemleyêka winasî bibo. Na hemle zîndan de bi rayberîya Mazlum Dogan, Hayrî Durmuş, Kemal Pîr, Ferhat Kurtay û Necmî Onerî de rêxistine bîye. Hemleya 15ê Tebaxe ser xoverdayîşê 14ê Temmuze ra aver şîye.”
15ê Tebaxe ruhêk o
Bayikî dewamê qiseykerdişê xo de wina va: “Wexto ke 15ê Tebaxe dest pêkerd, dewleta tirkî zaf bihêz bîye û tevger zî zeyîf bi. Kurdî ewro her hetî ra bihêz benî. 15ê Tebaxe ruhêk o û qet nêqedîyeno. Têkoşîn do hertim bi nê ruhî dewam bikero. 15ê Tebaxe ruhê azadî û demokrasîye yo. 15ê Tebaxe ruhê wayîrvejîyayîşê xo yo û teslîmbîyayîşî qebul nêkeno. No ruh tevger û şarî ganî tepişeno. Kurdî nê ruhî fam kerdo û nê ruhî cuyeno. Erdogan û Bahçelî tena vera PKKyî de nê, vera kurdanê heme dinya de dişmenî kenî. Çîyê ke Kenan Evrenî nêşêna bikero, Erdogan û Bahçelî wazenî bikerî.”
Eke ma xo rêxistine bikerî, ma serkewenî
Bayikî qiseykerdişê xo wina domna: “Ganî kurdî vera Erdogan û Bahçelîyî de têkoşîn bidî. Reyna ganî hêzê sosyalîstî vera nînan de têkoşîn bidî û wayîrê Rayber Apoyî bivejyî. Wayîrê Rayber Apoyî vejîyayîş, yeno manaya vera tecrîdî de têkoşîn dayîş. CHP bi sîyasetê xo xizmetê Erdoganî keno. Yê ke vera faşîzmî de yî ganî hêzê xo bikerî yewe û hêzê demokrasî awan bikerî. Ez veng dana ciwananê kurdan. Ciwananê kurdan heta nika qet faşîzmî qebul bikerî. Hêzê faşîzmî nêmendo. Eke ma xo goreyê felsefeya Rayber Apoyî rêxistine bikerî, ma eşkenî serkewtişanê girdan qezenç bikerî. Ganî şarê Tirkîya xo rêxistine bikerî.”
Zîndanan de ananeyê xoverdayîşî esto
Bayikî peynîya qiseykerdişê xo de bale ant xoverdayîşê hepsîyanê sîyasîyan yê zîndanî ser û wina qedêna: “Yê ke komel rêxistine kenî, erzenî zîndan. Wazenî îradeya înan bişiknî. Labelê ma tevgerêkê komelkî yî. Zîndanan de ananeyê xoverdayîşê ma esto. Zîndan zî cepheyê têkoşînî yo. Eke ma berpirsîyarîya xo bica bîyarî, ma eşkenî derbeyanê girdan bidî piro. Ma do serbikewî. Ez 15ê Tebaxe heme şerwananê azadî û xoverdakaranê zîndanî rê pîroz kena.”
ANF / BEHDÎNAN