Ez ewnîyena zaf qelemşorêy ma û fikrê zafêreya şarê ma pabokeya Rûs û TC jûbînan de şer bikê ra pey ‘Kurdistano azad bironîyo’ yo. No ewnîyayişeko zaf şaş o. Ma heta ke tarîxa xo ra ders megerêy se, halê ma kurdan şerî mîyan de do bi perîşanî biravêro. Ma vîra mekerêy ke heta ke kurdêy misliman tarîxa ereban nêteriknêy halê ma bi qerimyayişî bibo. Zey mesela; ‘Malê zengînî çenga feqîran qerimneno’ kurdîy deja xo ya bi seserran dayê vîrakerdiş.
Wexta ke ma tarîxa kurdan ya nezdî ra biewnêy Komploya Mîyannetewî ya Serekê Kurdî û Mazlûman Abdullah Ocalanî se ma do tarîxîra derseke bivejê û do hewna weş bêro famkerdiş ke, çira ez vana dewletan ra ma kurdan ra xêreke çîno. Qomloyî de para rûsan zaf o û sexsê Ocalanî de kurdan bi pereyan û peymanêy bezîrganî rot. No semedî ra, wa kes rûsan ra feydeyeke nêpawo. Haaa beno ke tikey cayan de têkilîy bêronîyê, no wa meyro mana ‘azadîya kurdan do Rûsya an zî Amerîka bidero’.
Ez nêvana wa dîplomasîya kurdan têkilîya xo nînan de qut bikero, ez wazena wa kurdîy bizanêy ke bê kurdan ti keseke ra feydeyeke nêpawîyo. Ez vana ke, hîyeraşîya dewletan de şikyenêy kurdan bikê qurbana bezîrganîya xo ya mîyannetewî û goreya ney lazimo sîyasetmedarêy ma no warî de polîtîka û paradîgmayê kurdan ra tawîz nêderêy û serkewte bibêy.
Wa kesîy zaf meraq mekerêy ke Rûsya û TC mîyan de şer do bivejyo an zî nêvejyo. Keso ke no hewesî de cuyenêy kesêy ke rayvistişê înan de kemanî esto yê. Çimkî, kurdîy û dewletêy Dinyaye her tim şerî mîyan de yê û êy kesîy nêvînenêy. Yanê, ez vana ke Dinya de her tim şereko germin nêbo se zî şereko pîsîkolojîk, sîber, medya, kultir, sînoran, dînan û mezheban esto û her tim tikeyî adirî kûre kenêy ke wa adirê şeran gur bibo. Waşteya min ayo ke, lazimo hemeyê kurdan û mazlûman tewrêy şeran bizanêy biderêy zanayiş û xoverdayişeke verbê êy şeran de hişyar bibêy. Çimkî vajîyeno; “Xoverdayiş cuyayiş o” no semedî ra, lazimo ma kurdîy xoverdayiş biderêy ke, cuyayişê xo berdewam bikerêy.
Ez nimûneyeke verçiman de biderî. Dinya hem ezana ke TC bi çekan û her hawayî ardimê DAIŞe kena. La vengê xo nêkenêy. Semedo ke têkilîya înan a bezîrganî esto yo. Semedo ke meselayî de kurd esto yo. Semedo ke kurdîy Kurdistano Federal a Cuyokraştîyî awan mekerêy Dinya vengê xo nêvejena. Min verî zî nuştbi, bêvengeya înan do bibo bela serê înan û haw Fransa û dewletêy bînan de no verçiman de vejyayo meydanî û do hewna zî bivejyo meydanî.
Ez tîyara çîyeke bîn semedê amayişî bivajî, eke bêvengbîyayişê dewletan wina biromîyo se, des serrêy ma ver de do Amerîka û Ewropayî ra zaf merdimîy terora dewletan ya weyekerdişê DAIŞ û no tewrî de çeteyan ver de, şar do mecbûr bimano sifet Kurdistanî û pey ra zî Mezopotamyayî bikerêy. Çimkî ey demî de do cayê herî biewle û verbê terora DAIŞe û dewletan warê Kurdistanî do zaf bi ewle bibo. No zî do bi saya rayvsitişeya PKKe û ardimkarêy ci, şarê kurdî û bi warvejyayişê paradîgmayê cuyokraştîya kurdan do bibo.
Ehmedê Bira