Şar do dizdan ra hesab biperso

Hemserekê Şaredarîya Bajarê Girdî ya Amedî Selçûk Mizrakliyî dîyar kerd ke înan quruşêk zî şaşîye nêkerda, eke ê îradeya şarî qebul nêkerî, do vînî bikerî. Hemsereka Şaredarîya Bajarê Girdî ya Wanî Bedîa Ozgokçe Ertane zî da zanayene ke wextê şîyayîşê nê îqtîdarî ameyo û va ‘şar do dizdan ra hesab biperso’.

19ê Tebaxe de îqtîdarê AKPyî qayûm tayînê şaredarîyanê Amed, Wan û Mêrdînî kerdbî. Vera tayînbîyayîşê qayûman de reaksîyonî her ke şono zêde benî. Serekkomar Erdoganî seba tayînkerdişê qayûman vatbi ‘ê peran erşawenî Qendîlî rê’. Medyaya hetgire de zî bi taybetî ca dîyeno vatişanê inasarênan û hewl dîyeno fehmêko winasî bêro awankerdene.

Hemserekê Şaredarîya Bajarê Girdî ya Amedî Adnan Selçûk Mizrakliyî qisey ker. Mizrakliyî vera vatişanê Erdoganî de reaksîyon nîşan da û dîyar kerd ke çîyê ke şima vanî zurê boçikin î û şima mecbûr î ke belge zî nîşan bidî.

Mizrakliyî va ‘roja ke ma weçînîyayî ra nata ma xo vera kerra, herre, morcela, dare û merdiman de berpirsîyar vînenî’ û wina domna: “Ma heme karanê xo goreyê mevzûatî kerdî. Karê ke şaredarîyan de ameyî kerdene, xora computuranê Wezîrîya Karanê Teberî de asenî. Ma quruşêk zî şaşî nêkerda, eke bibîyêne, înan dîyêne.”

Wa Homa heqê îftîrakaran bido

Mizrakliyî bale ante deynê hetê qayûman ra amebi verdayene ser û wina va: “Ma 4 aşmî û nîme de nizdîyê 73 mîlyon TL deyn da. Ti kes nêşêno îftîra bierzo ma. Eke ma quruşêk pereyê şarî werdo, wa Homa heqê ma bido. Neke wa ê îftîrakaran bido. Tirkîya êdî nêşêna bi nê bêhuqûqîyan xo biresno cayêk. Eke ma pîya bicuyî, o wext ganî estena ma qebul bikerî. Wa goreyê huqûq û demokrasî hereket bikerî. Ma heqanê xo zanî û ma do heta peynîye heqanê xo bikar bîyarî. Ma tîya ra îradeya xo nîşan danî. Herçiqas ke weçînayîşan de zaf çîyî ameyî kerdene zî, ma bi nîsbetêko berz qezenç kerd. Eke ewro tayê bivejyî û vajî ‘ma îradeya şima nêşinasnenî’ o wext ma ê do vînî bikerî.”

Wextê erşawitişê AKP û MHPyî ameyo

Hemsereka Şaredarîya Bajarê Girdî ya Wanî Bedîa Ozgokçe Ertane zî daye zanayene ke blokê AKP û MHPyî ancax bi têkoşînê Kurdan do şêrî û dîyar kerd ke şarê Wanî do dizdan ra hesab biperso. Ozgokçe daye zanayene ke tayînkerdişê qayûman ecizî ya û wina dewam kerde: “Hukmat demêko derg o hetê meşrûîyetî de probleman cuyeno. 2016 de zî şaredarîyê ma hetê îqtîdarî ra ameybî xespkerdene û hemserekî erzîyaybî zîndan. Merdimî ewro zî vera neheqîyan de reaksîyon nîşan danî. Ê do nêşênbî nînan dinya rê îzeh bikerî.”

Şar şîyayîşê nê îqtîdarî wazeno

Ertane dewamê qiseykerdişê xo de wina va: “Goreyê mevzûatî ê eşkenî hertim qayûm tayîn şaredarîyan bikerî. Kurdî hertim neheqîyan reyde têrî manenî. Ma bi serran o ke vera neheqîyan de xo pawenî û qezenç kenî. Çimkî îradeya ma esta. Ma nê kerdişan qebul nêkenî û seba edealet û aştîye veng danî. Wexto ke ma vîyarteyê sîyasetê Tirkîya ra ewnîyenî, kamcîn partîyê ke Kurdan raya xo daya înan, bîyî îqtîdar. AKP zî 2002 de bi rayanê Kurdan bi îqtîdar. Ewro Kurdî dîyar kenî ke wextê şîyayîşê AKPyî ameyo. Cok ra no wina nêşono. Vera îradeya şarî de no îqtîdar do nêşênbo payan ser o bivindero. Ez heme kesê ke bi rojan o ke payan ser o yo silam kena.

AMED