Parlamentera HDPyî ya Şirnexî Aycan Îrmeza ke serra 92î de bi vînîkerdişê dayîka xo raştîya şerî reyde rî bi rî menda, derheqê referandûmî de wina va: “Eke sindoq ra ‘ya’ bivejîyo, o wext her kes beno şirnexijo potansîyel. Do hêrsê mergan sindoqan ra bivejîyo.”
Parlamentera HDPyî ya Şirnexî Aycan Îrmeza ke hîna 7 serreyîya xo de Newroza 92yî de bi vînîkerdişê dayîka xo raştîya şerî reyde rî bi rî menda, derheqê prosesê referandûmî de qisey kerde.Îrmeze destpêka qiseykerdişê xo de va ‘polîtîkayê şerî yê hukmatî dewam kenî û rijnayîşo ke bajar de virazîyeno nika ra netîceyê referandûmî dîyar kerdo’ û qiseykerdişê xo wina domnaye: “Çîyê ke Şirnex de ameyî cuyayîş hetê her kesî ra yenî zanayîş. Wextê qedexeyan de bînayê partî ameyî rijnayîş û dima ra sîyasetmedarî ameyî tewqîfkerdiş. Her çiqas ke hende çîyî bîyî zî ma do xebatanê xo keye bi keye bidomnî. Ma do wina bikerî ke şar şêro ser sindoqan.”
Sedamêko newe
Îrmeze dewamê qiseykerdişê xo de va ‘îradeya şarî orte de yo’ û wina dewam kerde: “Şar do nê şerî ra vajo nê. Eke bedilîyayîşê rejîmî ra bivajîyo nê, o wext do veşîyayîşê merdiman ra û rijîyayîşê Şirnexî ra zî do bivajîyo nê û do nê kerdişan rê bibo cewab. Wazenî bi bedilnayîşê qanûno bingeyî Sedam û Qedafîyêko newe xelq bikerî. Cok ra wexto ke ma şêrî sindoq ser, ganî ma Şirnex ra biewnî.”
Do hêrsê şarî qezenç bikero
Îrmeze qiseykerdişê xo de bale ante îxtîmalê sindoqan ra vejîyayîşê ‘ya’ ser û wina va: “Eke ‘ya’ bivejîyo, o wext her kes beno şirnexijêko potansîyel. Şarê Şirnexî şaro ke wayîrê ziwan û nasnameyê xo vejîyeno. Şarêk eke azadî û edalet rê wayîr bivejîyo, o wext keyeyê ci rijîyeno, yeno tewqîfkerdiş û beno koçber. Pawitişe ‘nê’yî yeno manaya pawitişê cuye û azadî. Ez veng dana her kesî, wexto ke tercîhêk bikerî, wa Şirnex bîyarî çimanê xo ver û wina tercîhê xo bikerî. Şar de hêrs û hîsê heyfgirewtişî yê girdî estî. Netîce de do hêrsê şarî bivejîyo. Ma do bi ‘nê’ qezenç bikerî.”
DÎHABER/AMED