HAMZA GUNDUZ / MA / COLEMÊRG
Colemêrg de vaya ciwalê arişî bîya 130 û vaya nanî zî bîya 1 TL û nîme. Vaybîyayîşî nanî ver şarî reyna vera xo dayo arêyan. Arêyê ke heta nika vindetbî û nêşuxilîyayênê, dest bi şuxilîyayîşî kerdî. Dewa Biyadirî ya Çelê ya Colemêrgî de arêwan Abdullah Kaynakî babete ser o qisey kerd.
Kaynakî va ‘Arêyî rê eleqe xeylê zêde bîyo’ û wina domna: “Demanê peyênan de arêyê mi 24 saetan xebetîyeno. Verê cû tayê dewijan xeleyê xo tehnayêne, labelê seba ke vaya ariş û nanî zêde bi, merdimî êdî arêyan tercîh kenî. Merdimî agêrenî 50 û 100 serrî verê. Êdî merdimî nêşênî çîyêk biherînî û debara xo bikerî. Destê înan de çîyêk nêmend. Cok ra merdimî kura de çi bivînî, ci reyde debara xo kenî. Arê 24 saetî akerde yo. Xeylê mintiqa û dewan ra merdimî yenî arê. Ez bêxera aşma teşrîna peyêne û gulane xele tehnena. Ez seba ke hetkarîya şarî bikera, arêyê xo nêpadena.”
Remzîye Kaynake zî va ‘ez hetkarîya merdeyê xo kena’ û wina dewam kerde: “Ma wextê kuncîyî de tahin virazenî. Çimkî kuncî karêko zehmetin o. Ma nika zî şewe û roje xele tehnenî.”