Demserran ra onca zemherî yo. Pûg û seqem, vewr û varino. Wextê berfînan o. Hîrê ceniyê Kurd yê îsyankar Sara, Rojbîn û Ronahî zî demê zemherî de, aşma çile de ameybî dinya û riyê xo daybî verê tîja rojî.
Alwoza rojî, ceniya asî yê Kurdistan Sakîne Cansiz, terteleyê '38'î yê Dersîm ra 20 serr tepya amêbî dinya. O wext dirbeta gird hona gonî rijna, jan, dej û kulê hometî akerdebi hona. Bêvengiya merdiş û hewrê siya ser Kurdistan û Dersîm geyriyaybî. Bado ke Sakîne Cansiz na raştî fehm kerd, seweta ke kay û çerxa qilêrîn yê serdestan xirabkero kewt ray û endî peyser nêageyriya. Emrê xo yê gencin ra tepya hurendiya istanikanê ters û zûrrî destpa vatisê istanikanê heqîqet yê Kurdistan kerd. Ayî jû reynî-finî sond wend bî, kesî nêşa verniya Ayî bigîro. Sakîne zey jû delop, bî laser û herikya perokîn welatî. Her ca de verra qûwetanê îşgalkerdoxan meterîsan de xover da. A ceniya wextanê sûrî bî. Demê adirîn de ronayişê PKK de cayê xo girewt û alwozanê xo ra piya Kurdistan de çêberê mîladê newî û raştî akerd. Ciwyana Ayî, bi lej-herb vîrd ra. Tenya verra faşîzm û zorvajiyê dewlet nê, verra kolebiyîna ceniyan, verra serdestiya camêrdan, verra pêrokîn paşverûteyanê hometî herb kerd. Kamiya Kurdbiyîn, alewîbiyîn û cenîbiyîn bedelê girz û giranî waşt û Ayî bedeldayiş ra xo peyser nêgirot. Pêrokîn planê tesfiyekerdiş û teslîmgirotiş yê dewleta îsgalkerdoxê romî zindanan de verra xoverdayişê Sakîne Cansiz û alwozanê ci de îflas kerd. Wexto ke tifê riyê celadê bê rih kerd, endî serbestiya şarê Kurd û biyayişê ceniyan bî garantî. Rixmê îşkence, def û dolabanê qilêrîn yê dişmenî raştiyanê xo ra tawiz nêda û wayrê heqîqeta Kurdan vejiya. Ceniya xoverder Sara zindanî de 'hiqûqê' ceza yê îşgalkerdoxan ra meydan wend û va; "Mahkemeyê şima yê îşgalkerdoxî nêşenê ma ceza bikerê.” No vinderdiş tenya dost û alwozanê ci nê, dişmenanê ci zî zaf tesîr kerd, lerzna. Nezdiyê 40 serranê tekoşînê xo de, him zindanî de, him teber de zerriya Ayî bi heqîqet eşt. Wext ezdiya la Sara nêezdiya. Sara, rayvera ceniyanê Kurd a, sembola ceniyanê xoverder a, çila ya raya serbestiya. Çi ke vurnayisê 'qederê kole' yê ceniyan de rolê do gird kaykerd. Cok ra A tariyî de roşniya ma, heqîqeta ma ya. Alwoza rojî, tîja hometî û welatê ma ya û do tim û tim raya ma rosn bikero.
Berfîn'a bîn yê welatê rojî, yê koyanê Nûrhaq'î zî, perîkeyna, ceniya zerrî pak û rî huwenok Rojbîn a. Çihar serrî badê qetlîamê Meres amêbî dinya. Kul a ke dişmenan welatê ay de akerdbî, kewt zerriya ay zî. Û ay zî raywaniya heqîqet da destpa kerdin. Verra sîstemê zûrker, komploger û nêheq yê Awrûpa serreyê xo wederna û îsyan destpa kerd. Kêber kêber geyriya û heqîqeta Kurdan qîr kerd. Verra meydan, rî û zerriyê cemidîn yê Awrûpayijan de omidê xo kerd gird. Bi huwenê xo yê germ zerriyê serdîn yê xerîban zî kerd germ. Rojbîn a ke bi rihê xoverdayiş bî pîl, ebi no rihê ciwyan û gureyînan de mora xo eşt xeylê serkewtişan.
Û pelpelika Kurdistan Ronahî. Hardê xoverdayoxan Amed ra ya. Hereketê Serbestî yê Ceniyanê Kurd de nifşa hîrêyîn bî. Bi istanikanê xoverdayişê Mazlûman, bi tekoşînê Sakîneyan bî pîl. Sîstema qilerîn yê Awrûpa red kerd, kewt raya serbestî û resya imbaza xo ya rayver Sakîne. Keynaya rojî Rohanî zey pelpelikan kilm û dekerde ciwya. Keyney û xortanê Kurdan rê zûrriyanê sîstemê koledar û istanikê raştî yê Kurdistan'î vat. Zey aw cayê xo de nêvindiya, her tim hetê deryayê girdî ray girot.
Rixmo ke qetilkerdişê nê hîrê şoreşgeranê Kurd ra didi serrî ravêrdî, la kiştoxî û komplogerî hona nêamey cezakerdin û yenê nimiten. Çi ke zerreyê na qetlîam de gista xeylê qûwetan û dewletan esta.
La rixmê hewldayinê nimitiş, wa herkes bizano ke, raştî her tim tarî de nêmanenê. Wext do bîro, na qetlîama qilêrîn zî do roşn bibo. Geyrayişê edalet û tekoşînê ceniyanê Kurd û şarê Kurd do heqîqetan vejero teber. Qûwetê ke nê ceniyan hedef girotî, tekoşîn, cesaret, îrade, mezg û zerriyê ci ra tersiyay. Wa neyra tepya hin jêde bitersê, çi ke tekoşînê nê ceniyan vilayê pêrokîn Kurdan bi. Wa kiştoxê Sara, Rojbîn û Ronahî neyra tepya hin vêşî bitersê çi ke îyê de heyf dayiş ra nêreynê-nêxelesyê û heta nefesê xo yê peynî bi no tersî biciwyê. Nika onca zemherî yo, onca 9'ê Çile yo. Wextê Berfînan o. Wextê Sara, Rojbîn û Ronahî'yan o.