ZANA SEYDÎ /DÎCLE EHMED / ANHA / KOBANÊ
1ê teşrîna peyêne Roja Kobanê ya Dinya yo û emser serrgêra 4. ya na rojî ya. Babete ser o Hemserekê Meclîsê Kantonê Kobanê Enver Muslîmî qisey kerd û melumatê muhîmî pare kerdî.
Muslîmî va ‘Kobanê hetê dinya ra nasbîyayîşê kurdan de rolêko gird kay kerd’ û wina domna: “Kobanê vera DAIŞî de xover da û nîşanê heme dinya da ke ê do heme kultur û tarîxê dinya bipawî. Kobanê de zî cinîyî rayberîya xoverdayîşî kenî.”
Muslîmî dewamê qiseykerdişê xo de va ‘kurdan sînorê Kobanê de bendêk awan kerd û destûr nêda ke çeteyî Tirkîya ra bikewî Kobanê mîyan’ û wina dewam kerd: “Şarê Vakurê Kurdîstanî bi doman, cinî û extîyar vejîyayî raşteyan û sere wedarna. Bi no qeyde binkewtişê çeteyanê DAIŞî de rolêko gird kay kerdî.”
Wa hetê bindestan de bivinderî
Muslîmî bale ante pêro pîya hereket kerdişê şaranê Vakurê Sûrîye û Kobanê ser û wina va: “Êdî ganî heme şarê dinya çimê xo akerî û projeyê demokratîke yê Vakurê Sûrîye bivînî. Ganî şarê dinya hertim hetê bindestan de bivinderî û vera dagîrkeran de sere nêronî. Serkewtişê Kobanê serkewtişê merdimîye yo. Ganî raya pêroyîya mîyanneteweyî senî ke 1ê teşrîna peyêne Roja Kobanê ya Dinya de vejîyayî raşteyan, ganî vera neheqîyê ke Efrîn de benî de zî bivejyî raşteyan.”