Rojawan de hêzê kurd û partîyê sîyasî seba tifaqa Kurdan xebatanê xo bê mîyan domnenê. Bi rayberîya Fermandarê Pêroyin ê QSD û KNK Rojawanî Mazlum Ebdî xebata tifaqa Kurdan yena kerdiş û heme temsîlkarê sazîye zî hetkarî danî xebate ra.
Hemsereka Komîteya Huner û Kultirî ya Hesekêyî Efaf Hesekî babete ser o aşkera kerd ke bi Şorişa Rojawanî şarê Kurd qezencê tarîxî dest kerdê û wina vat: “Çi heyfo ke şarê Kurd binê tade û zilmê rayberîyê şovenîst de maneno, seba ke ziwan û kultirê kurdan çinê bibê hêrişan kerdê. Dewletê bandorker Kurdistan 4 parçe kerdê.”
ENKS rameno tifaqa Kurdan ra
Hemsereka Komîteya Huner û Kultirî ya Hesekêyî Efaf pare kerd ke nika seba tifaqa Kurdan xebat meşyenê la tay şexis û partîyî na xebata pîroz ra ramenê û wina dewam kerd: “Şarê Kurd encax bi tifaqe eşkeno vera hêrişê komplogeran têkoşîn bido. Demê Osmanîyan ra nika kurdan ser o qetlîamî yenî kerdiş. Dewleta Tirk zî yenî polîtîkayê qetlîamî domnena. Ganî tifaqa xo awan bikê.”
ANHA/HESEKÊ