Bayik sebebê tecrîdê vera Ocalan'î, zey israrê ey deklarasyonê 28"ê şibat û destcikerdinê muzakereyan hesibina û wina vat: Qandê fikrê Rayver Apo meresê şaran, tecrîd vistiya dewre. Ê jî zanê ki Rayver Apo wazeno Tirkiye demokratîk bibo. Heme xebatê Rayver Apo qandê demokratî-kerdin û çareserînê. Rayver Apo bê demokratîk-kerdin çiyê bîn nêfikiriyeno. Coka AKP vera Rayver Apo tecrîd visto dewre.
'Rayver Apo bi xo jî û ma jî nay zanê'
Bayik ard ziwan ki ê nêzanê bi heyeta dewleta pêdiyinî estê yan çiniyê û wina vat: "Vera Rayver Apo lejê psîkolojîk ramiyeno. Rayver Apo bi xo jî û ma jî nay zanê. Eno çiyê eşkere yo. Cayo ki pêdiyinî çarçiweyê sîstemî de meviraziyê û hukumet goreyê kêfê xo hereket bikiro, wija kes nêşeno qalê demê çareserîn bikiro. Çimki mûxatê demê çareserîn Rayver Apo û Hereketê ma yo. Helbet ma mahneyê nezdiyayinê vera Rayver Apo zanê. Wa dewleta tirk jî, AKP jî û raya pêroyin jî bizano, mayê qandê menfatanê pêrinê şaranê Tirkiye, wina nerm û meqûl nezdiyê mesele benê."
'Rayver Apo, sebebê lej û aştî yo'
Cemîl Bayik dazanayin ki sînorê sebrê înan esto û wina dewam kerd:
"Eki hinî Rayver Apo şertanê azad de muzakereyan mekiro, xora o çax kes nêşeno qalê demê çareserîn bikiro. Eki qandê muzakereyan meşirê Îmralî, o çax mahneyê şiyayini çiniyo. Wazenê vajê, eki şima teslîm mebê, şiyayinê Îmralî çiniyo. Şiyayinê heyet, mînet mûsnenê. Wa rind bizanê, nezdîbiyayinê vera Rayver Apo, yeno mahneyê lejê vera kurdan. Ma tim vat, vina bîn vanê, qandê ma nezdîbiyayinê Rayver Apo, sebebê lej û aştî yo. Sernî de gencî, gerek bi hezaran kesî verê xo açarnê koyan. Şar û gerîlayo wayirê Rayverê xo vejiyo."
'Çira kurdî tifîngan viradê'
Bayik vatenê rayveranê AKP û dewleta tirk ê zey wa PKK tifîngan virado jî, zey siyasetê 40 seranê peyinan hesibina û rexne kerd.
Bayik vist vîrî ki rayveranê tirk HDP ra wazenê qandê viradayinê tifîngan veng bido PKK û wina vat: "Ê wazenê ma teslîm bibê. 40 sero rayverê tirk eynî wastenan anê ziwan. Miyanê Rojhilatî kes tifîngan nêviradano. Çira kurdî tifîngan viradê. Viradayinê tifîngan yeno mahneyê teslîmbiyayinê çete û celadan."
'Gerek PDK rast nezdiyê kurdan bibo'
Bayik siyasetê PDK sero jî qisey kerd û wina vat: "PDK verê weçînayinî alozîn vet. Têkiliyê xo birnay û ziwanê êrişkar veti ravey. PDK bi sebebê têkiliyanê xo ê bi AKP ra wina kerd. PDK û AKP vêşiyê 10 seriyo piya hereket kenê. Başûrê Kurdistanî wextê îktîdarê AKP de biyo zey cayê qezenckerdinê AKP. Qe cayê bîn ê zey Başûrê Kurdistanî çiniyo, kedê xo wina ercan keno xizmetê dewleta tirk. Eki Tirkiye de krîzê siyasî nêbiyo, sebebê nay, çiyê ercan Başûrê Kurdistanî ra şinê yê. PDK vinîkerdinê AKP, zey vinîkerdinê xo dî û vînena. Coka wextê weçînayinan de medya PDK, zey TRT û medya AKP xeftiyay.'"
Bayik ard ziwan ki şertê Miyanê Rojhilatî, jûwîna kurdan ferz kenê û vat: "PDK cayo ki bi siyasetê xo îtîbarê xo berz bikiro, êrişê PKK kena. PKK menfatanê heme kurdan fikiriyeno. Eki geîrla meşiyayê Şengal, pêşmergeyanê PDK nêşayê nezdiyê wijay jî bibê. Halê têkiliyanê nikay ne xizmetê PDK û ne jî xizmetê pêrinê kurdan keno. Gerek PDK siyasetê xo bivurno û rast nezdiyê kurdan bibo û xizmetê jûwîna kurdan bikiro."
NAVENDA XEBERAN