SOLÎN REŞÎD / ANHA / EFRÎN
Kesê ke qezaya Şêrawa ya Efrînî de cuyenî, herçiqas ke zext û hêrişanê girdan vînenî, labelê reyna zî awanîyanê xo yê tarîxîyan pawenî. Nimuneyê pawitişî tewr zaf Dewa Zîyaretî de yenî dîyayene. Dewe de tayê banî 100 serrî verê ameyî viraştene û ewro sey roja sifteyîne payan ser o yî.
Keso bi nameyê Cuma Mihemed Hesen zî wayîrê nê banan ra yo. Hesen dîyar keno ke banê ci tewr tay 100 serrî verê ameyo viraştene. Odeyê banî bi kolonan yewbînan ra cîya bîyî û serbanê ci zî texteyan reyde ameyo viraştene. Mîyanê banî de seba ke awa varanî şêro teber, qulî ameyî viraştene. Mitbaxê banî zî bi şewqê rojî roşn beno. Binê banan de zî seba heywanan axur esto.
Cinîya bi nameyê Xedîce Xelîl Qasima ke zewajî ra dima dewa Zîyaretî de ca bîya, kel-melanê tarîxîyan pawito. Xedîce Xelîl Qasime dîyar kena seba ke nê kel-melî neqlê neslanê neweyan bibî, ê do nînan bipawî. Dewe de haceta tehnayîşê qehweyî, misînê awe, sifreyê ke qamîşî reyde virazîyayî û sewbîna xeylê çîyî tarîxî yenî pawitene.