Şaredariya AKP ke, rîwalê zimistan û hewayê serd, ‘semedê heywananê teber de werdiş veradena’ û çapemenî de propagandayê xo kena, la heta bîn ra welatijanê xo bê aw ternena û mexdûr kena. Taxa Yenîmahalle û Mirzan de, bi rojano welatijî bê awî yê. Welatijan ra Celal Burkuk derheqê babedî de qisey kerd û ard zon ke, heta veriya jû aşm nîm problemê aw çinîbe. Burkuk da zonayen ke, heta nika aw seat 12’ê şew de birniya û 5ê sodir de kî amê. La nika tenya bi roj 2 seatî aw yena dayen. Rexmê serpirodayişê welatijan yê şaredarî, problem nêamê çareser kerdin.
‘Ma mexdûrî yê’
Burkuk da zonayene ke, ronişteyê taxî mexdûrî yê û ina va: “Ma serpirodayişê şaredarî kerd, la vatî ke, amnanî de baxçe biyo awîn. Baxçeyê çi? Nika zimistan o. Wezîfeyê sifteyîn yê şaredarî no yo, la jû aşm û nîm o ke, ma problemê aw ancenê. Bi zanabiyen ina kenê? Burkuk va, tim û tim behsê jû problem kenê. Wesar, amnan, zimistan problem dewam keno.
Şaredarê AKP xîzmet nêkenê
Ser nêrazîbiyenê welatijan, şaredarî bi behaneyê ‘şert û zelmetiyê zimistanî’ xo pawit û aşkere kerd ke, rîwalê varîna vowr, nêşkenê bigurwê. Şaredarî derheqê birnayina aw û hêrsê welatijan de, înan ra fehmkerdiş waşt. Şaredariyê sûk û yê qezayanê Çewlig ke piraniyê ci destê AKP de yê, ne zimistanî de, ne erdlerzinî de, ne zî zehmetiyanê bînî de welatijan het de çinya. Vera nay, şaredarê AKP welatijan hona vêşî kenê mexdûr. Sûk de ne rayî viraziyenê, ne nêweşxane ne kî xîzmetê bîn.
ÇEWLIG
Çewlig de operasyonê qirkerdinê siyasî
Hemserokê qezaya Çewlig Azarpêrt yê DBP û HDP 31ê Çile de, netîceyê operasyonê qirkerdina siyasî de girotiyay bin çiman.
Qûwetanê dewlet roja Yewşem, eştî keyeyanê Hemsekorê HDP yê Azarpêrt Saît Guvenç, Hemserokê DBP yê Azarpêrt Yilmaz Dîrek, Rayverê HDP Tûncay Dîrek ser. Netîceyê sereştişan de, Dîrek, Guvenç û Dîrek girotiyay bin çim. Qezaya bîn yê Çewlig Gêxî de zî, polîsan eşt keyeyê welatijê bi nameyê Mesût Kaya ser û ey girot bin çim. Kesê ke amey binçimkerdin berdinîy Midûriyeta Emniyet yê Azarpêrt.
DÎHA/ÇEWLIG